សហរដ្ឋអាមេរិក៖ ​លោក​ប្រធានាធិបតី​អាមេរិក Joe Biden និង​សម្ព័ន្ធមិត្ត​សហភាព​អឺរ៉ុប​បាន​ពិភាក្សា​ពី​សង្គ្រាម​ដ៏​ឃោរឃៅ​របស់​រុស្ស៊ី នៅ​ក្នុង​ប្រទេស​អ៊ុយ​ក្រែ​ន​កាលពី​ថ្ងៃ​ចន្ទ ជា​ការ​ចាប់ផ្ដើម​សប្ដាហ៍​ដ៏​សំខាន់​ក្នុង​ភាព​ជាប់​គាំង​របស់​បណ្ដា​ប្រទេស​លោក​ខាង​លិចជាមួយ​ទីក្រុង Moscow ដែល​នឹង​មើល​ឃើញ​លោក Biden ទៅកាន់​ប្រទេស​ប៉ូឡូញ បន្ទាប់ពី​ចូលរួម​ជំនួប​កំពូល​អង្គការ​ណា​តូ និង​សហភាព​អឺរ៉ុប​។

​សេត​វិមាន​និយាយ​ថា លោក Biden បាន​រៀប​ចំ​ជំនួប​តាម​ទូរស័ព្ទដែល​មាន​រយៈពេល​ជិត​មួយ​ម៉ោង ជាមួយ​លោក​ប្រធានាធិបតី​បារាំង Emmanuel Macron, អធិការបតី​អាល្លឺម៉ង់លោក Olaf Scholz, នាយករដ្ឋមន្ត្រី​អ៊ីតាលីលោក Mario Draghi និង​នាយករដ្ឋមន្ត្រី​អង់គ្លេសលោក Boris Johnson ដើម្បី​ពិភាក្សា​ពី​ការ​ឆ្លើយ​តប​ទាំងឡាយ​ដែល​បាន​សម្របសម្រួល​។ ​សេត​វិមាន​បាន​និយាយ​ថា មេដឹកនាំ​ទាំងនោះ​បាន​ពិភាក្សា​ពី​ក្ដី​បារម្ភ​ធ្ងន់ធ្ងរ​របស់​ខ្លួន​ អំពី​មធ្យោ​បាយ​ដ៏​ឃោរឃៅ​របស់​រុស្ស៊ី​នៅ​អ៊ុយ​ក្រែ​ន រួម​ទាំង​ការវាយប្រហារ​របស់​ខ្លួន​លើ​ជន​ស៊ីវិល​។ សេត​វិមាន​បន្ត​ថា មេដឹកនាំ​ទាំងអស់​បាន​គូស​បញ្ជាក់​ពី​ការ​គាំទ្រ​ដែល​នៅតែ​បន្ត​របស់​ខ្លួន​ដល់​អ៊ុយ​ក្រែ​ន រួម​ទាំង​ការ​ផ្ដល់​ជំនួយ​សន្តិសុខ​ទៅកាន់​ប្រជាពលរដ្ឋ​អ៊ុយ​ក្រែ​ន​ដ៏​អង់អាច ​ដែល​កំពុង​ការពារ​ប្រទេស​ពួកគេ​ពី​ការវាយប្រហារ​របស់​រុស្ស៊ី និង​ជំនួយ​មនុស្សធម៌ទៅកាន់​ជនជាតិ​អ៊ុយ​ក្រែ​ន​រាប់​លាន​នាក់​ដែល​បាន​រត់​ភៀសខ្លួន​។

​នៅ​ថ្ងៃ​ពុធ​ស្អែក​នេះ​លោក Biden នឹង​ចាក​ចេញពី​សហរដ្ឋអាមេរិក​សម្រាប់​ដំណើរ​ដ៏​សំខាន់​បំផុត​របស់​លោក​ ទៅកាន់​បរទេសក្នុង​ពេល​កាន់​ដំណែង​ជា​ប្រធានាធិបតី​របស់​លោក​។ លោក​នឹង​ចូលរួម​ជំនួប​កំពូល ២​ នៅ​ថ្ងៃ​ព្រហស្បតិ៍​នៅ​ទីក្រុង​ Brussels​ បន្ទាប់មក​នឹង​ជួប​ប្រធានាធិបតី​ប៉ូឡូញ​លោក​ Andrzej Duda ក្នុង​ប្រទេស​ប៉ូឡូញ ស្ថិតនៅ​ខ្សែត្រៀម​ជួរមុខ​នៃ​ការ​ប្រឈម​របស់​លោក​ខាង​លិច​ជាមួយ​រុស្ស៊ី​នៅ​ថ្ងៃ​សៅរ៍​៕

អត្ថបទ៖ សុខមាន