លោក Volodymyr Zelenskyy បានព្រមានថា លោក Vladimir Putin បានចាប់ផ្តើមសង្គ្រាមលោកលើកទី៣ ហើយត្រូវតែបញ្ឈប់ ក្នុងការលើកឡើងរបស់លោកដែលធ្វើឡើងនៅមុនខួប៤ឆ្នាំពេញនៃជម្លោះ។

យោងតាមទីក្រុងគីវ រុស្ស៊ីបានប្រើយានដ្រូនជិត៣០០គ្រឿង និងមីស៊ីលចំនួន៥០ គ្រាប់វាយប្រហារទៅលើប្រទេសអ៊ុយក្រែនពេញមួយយប់ ដោយបានសម្លាប់មនុស្សម្នាក់ និងយ៉ាងហោចណាស់៨នាក់ផ្សេងទៀត រួមទាំងកុមារម្នាក់ផងបានរងរបួស។

មេដឹកនាំអ៊ុយក្រែនរូបនេះបានទទូចថា ការឈ្លានពានរបស់លោក Putin បានចាប់ផ្តើមជម្លោះកាន់តែធំ ដែលប៉ះពាល់ដល់សណ្តាប់ធ្នាប់ពិភពលោក និងបានជំរុញឱ្យមានសម្ពាធយោធា និងសេដ្ឋកិច្ចយ៉ាងខ្លាំងប្រឆាំងនឹងរុស្ស៊ី។ លោកបានប្រាប់ទូរទស្សន៍ BBC ថា រូបលោកជឿថាលោក Putin បានចាប់ផ្តើមសង្គ្រាមលោកលើកទី៣ រួចទៅហើយ។

សំណួរគឺថា តើរុស្ស៊ីនឹងអាចដណ្តើមយកទឹកដីបានប៉ុន្មាន ហើយថាត្រូវបញ្ឈប់លោក Putin ដោយរបៀបណា។រុស្ស៊ីចង់ដាក់លើពិភពលោកនូវរបៀបរស់នៅខុសគ្នា និងផ្លាស់ប្តូរជីវិតដែលមនុស្សបានជ្រើសរើសសម្រាប់ខ្លួនឯង។

ការលើកឡើងទាំងនេះកើតឡើងស្របពេលការពិភាក្សាត្រីភាគីដែលកំពុងបន្តដើម្បីធានាបាននូវបទឈប់បាញ់រវាងរុស្ស៊ី និងអ៊ុយក្រែន នៅស្វីសកាលពីថ្មីៗនេះហាក់គ្មានបានលទ្ធផលជាដុំកំភួនសោះ។

ខណៈសង្គ្រាមខិតជិតដល់ខួប៤ឆ្នាំពេញ រុស្ស៊ីទទូចឱ្យអ៊ុយក្រែនប្រគល់ទឹកដីសំខាន់ ខណៈលោក Zelenskyy មានការស្ទាក់ស្ទើរចំពោះកិច្ចព្រមព្រៀងណាមួយដែលពុំមានការធានាសន្តិសុខរឹងមាំ។

គួររម្លឹកថា រុស្ស៊ីបានបញ្ជូនទ័ពចូលអ៊ុយក្រែន កាលពីថ្ងៃទី២៤កុម្ភៈឆ្នាំ២០២២៕