អាជ្ញាធរប្រទេសស៊ីរីនិយាយថា ពួកគេបានជម្លៀសចេញទាំងស្រុងនិងបិទជំរំដាច់ស្រយាលមួយកន្លែងដែលបានរក្សាទុកសាច់ញាតិរាប់ពាន់នាក់របស់សមាជិកក្រុមប្រដាប់អាវុធអាយស៊ីស(ISIS)។ ប្រជាជនចុងក្រោយត្រូវបានបញ្ជូនចេញតាមក្បួនរថយន្តកាលពីថ្ងៃអាទិត្យ នេះបើយោងតាម លោក Fadi al-Qassem មន្ត្រីរដ្ឋាភិបាលស៊ីរីដែលគ្រប់គ្រងជំរំនេះ។

លោក al-Qassem បានប្រាប់ទីភ្នាក់ងារសារព័ត៌មានបារាំង Agence France-Presse ថា «គ្រួសារស៊ីរី និងមិនមែនជនជាតិស៊ីរីទាំងអស់ត្រូវបានជម្លៀសចេញ»។ Al-Hol មានទីតាំងនៅតំបន់វាលខ្សាច់នៃខេត្ត Hasakah ភាគឦសាន បានរក្សាទុកសាច់ញាតិមួយចំនួនធំរបស់ជនសង្ស័យជាអ្នកប្រយុទ្ធអាយស៊ីស ជាយូរមកហើយ។

នៅពេលឈានដល់កម្រិតខ្ពស់នៅឆ្នាំ ២០១៩ ជំរំនេះបានផ្ទុកមនុស្សប្រហែល ៧៣.០០០ នាក់។ កាលពីខែមុន មានអ្នកស្រុកប្រហែល ២៤.០០០ នាក់ ភាគច្រើនជាជនជាតិស៊ីរី ប៉ុន្តែក៏មានជនជាតិអ៊ីរ៉ាក់ និងជនបរទេសជាង ៦.០០០ នាក់ផ្សេងទៀតដែលមានសញ្ជាតិផ្សេងៗគ្នា។

ខណៈអ្នកស្រុកនៅក្នុងជំរំនេះមិនមែនជាអ្នកទោស ហើយភាគច្រើនមិនត្រូវបានចោទប្រកាន់ពីបទឧក្រិដ្ឋ ពួកគេត្រូវបានឃុំខ្លួននៅក្នុងកន្លែងមានការការពារយ៉ាងតឹងរ៉ឹង រយៈពេលជាច្រើនឆ្នាំមកហើយ។

កាលពីខែមុន រដ្ឋាភិបាលស៊ីរី បានដណ្តើមយកមកគ្រប់គ្រងជំរំនេះពីអាជ្ញាធរឃឺដ ខណៈទីក្រុងដាម៉ាស បានពង្រីកវិសាលភាពរបស់ខ្លួននៅទូទាំងភាគឦសានប្រទេសស៊ីរី។