នាយករដ្ឋមន្ត្រីប្រទេសហុងគ្រី លោក Viktor Orban កាលពីថ្ងៃអាទិត្យ បានប្រកាសវិធានការតបតចំនួនបី ក្នុងការឆ្លើយតបទៅនឹងការផ្អាករបស់អ៊ុយក្រែនជុំវិញការបញ្ជូនប្រេងឆៅតាមរយៈបំពង់បង្ហូរប្រេង Druzhba។ នៅក្នុងការបង្ហោះនៅលើបណ្តាញផ្សព្វផ្សាយសង្គម លោក Orban បាននិយាយថា ប្រទេសហុងគ្រី នឹងទទួលបានការផ្គត់ផ្គង់ប្រេងឥន្ធនៈរបស់ខ្លួន និងចាត់វិធានការតបតជាចាំបាច់ រហូតដល់ការបញ្ជូនប្រេង បន្ត។

វិធានការទាំងនេះរួមមាន ការបញ្ឈប់ការបញ្ជូនប្រេងម៉ាស៊ូតពីប្រទេសហុងគ្រីទៅកាន់ប្រទេសអ៊ុយក្រែន ការបដិសេធមិនផ្តល់ប្រាក់កម្ចីខាងយោធា និងបញ្ឈប់ការគាំទ្រចំពោះទណ្ឌកម្មថ្មីរបស់សហភាពអឺរ៉ុបប្រឆាំងរុស្ស៊ី រួមទាំងកញ្ចប់ទណ្ឌកម្មលើកទី២០របស់ប្លុកនេះផងដែរ។ លោក Orban បានសង្កត់ធ្ងន់ថា សន្តិសុខថាមពលគឺជាបញ្ហាផលប្រយោជន៍ជាតិជាមូលដ្ឋាន ហើយសកម្មភាពណាមួយដែលធ្វើឱ្យប៉ះពាល់ដល់ការផ្គត់ផ្គង់ថាមពលរបស់ប្រទេសហុងគ្រី នឹងត្រូវបានឆ្លើយតបយ៉ាងម៉ឺងម៉ាត់។

លោកបាននិយាយថា ប្រទេសហុងគ្រីនឹងរក្សាស្ថិរភាពសេដ្ឋកិច្ចនិងសង្គមរបស់ខ្លួន និងចាត់វិធានការបន្ថែមទៀត ប្រសិនបើចាំបាច់។ រដ្ឋមន្ត្រីការបរទេស និងពាណិជ្ជកម្មប្រទេសហុងគ្រី លោក Peter Szijjarto បាននិយាយនៅក្នុងសេចក្តីថ្លែងការណ៍តាមវីដេអូនៅលើបណ្តាញផ្សព្វផ្សាយសង្គមកាលពីថ្ងៃអាទិត្យថា ប្រទេសហុងគ្រីនឹងរារាំងការអនុម័តកញ្ចប់ទណ្ឌកម្មលើកទី២០ របស់សហភាពអឺរ៉ុបប្រឆាំងនឹងរុស្ស៊ី នៅក្រុមប្រឹក្សាកិច្ចការបរទេសនៅថ្ងៃចន្ទនេះ។

លោកបាននិយាយថា ការសម្រេចចិត្តរបស់អ៊ុយក្រែន មិនឱ្យចាប់ផ្តើមឡើងវិញការបញ្ជូនប្រេង គឺជា «ការគំរាមកំហែងផ្នែកនយោបាយ» ក្នុងបំណងធ្វើឲ្យរំខានដល់ការផ្គត់ផ្គង់ប្រេងឥន្ធនៈ និងជំរុញឱ្យតម្លៃប្រេងសាំងកើនឡើងមុនការបោះឆ្នោតសភារបស់ប្រទេសហុងគ្រី។