មន្ត្រីជាន់ខ្ពស់ហាម៉ាសម្នាក់ បានប្រាប់សារព័ត៌មាន AFP កាលពីថ្ងៃអាទិត្យថា ចលនាប៉ាឡេស្ទីននេះ កំពុងស្ថិតក្នុងដំណាក់កាលចុងក្រោយនៃការជ្រើសរើសមេដឹកនាំថ្មី ដោយមានឥស្សរជនលេចធ្លោពីររូបប្រកួតប្រជែងដណ្តើមតំណែងនេះ។

នាពេលថ្មីៗនេះ ក្រុមហាម៉ាសបានបញ្ចប់ការបង្កើតក្រុមប្រឹក្សា Shoura ថ្មី ដែលជាស្ថាប័នប្រឹក្សាយោបល់ដែលភាគច្រើនមានអ្នកប្រាជ្ញផ្នែកសាសនាជាច្រើនរូប និងការិយាល័យនយោបាយថ្មីមួយ។

សមាជិកក្រុមប្រឹក្សានេះ ត្រូវបានជ្រើសរើសរៀងរាល់ ៤ឆ្នាំ ម្តង ដោយតំណាងមកពីសាខាទាំងបីរបស់ក្រុមហាម៉ាស៖ តំបន់ហ្កាហ្សា តំបន់វេសបែងដែលគ្រប់គ្រងដោយអ៊ីស្រាអែល និងថ្នាក់ដឹកនាំខាងក្រៅរបស់ ចលនានេះ។

អ្នកទោសនៃក្រុមហាម៉ាសនៅក្នុងពន្ធនាគារអ៊ីស្រាអែល ក៏មានសិទ្ធិបោះឆ្នោតផងដែរ។

បន្ទាប់មក ក្រុមប្រឹក្សានេះជ្រើសរើសការិយាល័យនយោបាយ ដែលជ្រើសរើសប្រធានចលនានេះ។

មន្ត្រីរូប ដែលបាននិយាយដោយសុំមិនបញ្ចេញឈ្មោះ បានបញ្ជាក់ថា៖«ចលនានេះ បានបញ្ចប់ការបោះឆ្នោតផ្ទៃក្នុងរបស់ខ្លួន នៅក្នុងតំបន់ទាំងបី ហើយបានឈានដល់ដំណាក់កាលចុងក្រោយនៃការជ្រើសរើសប្រធានការិយាល័យនយោបាយ»។

លោកបានបន្ថែមថា ការប្រណាំងប្រជែងសម្រាប់តំណែងជាអ្នកដឹកនាំរបស់ក្រុមឥឡូវនេះ គឺរវាងលោក Khaled Meshaal និងលោក Khalil Al-Hayya។

ប្រភពទី២របស់ក្រុមហាម៉ាស បានបញ្ជាក់ពីការផ្លាស់ប្តូរសមាសភាពនៃថ្នាក់ដឹកនាំ នៅក្នុងអង្គការនេះ ដែលបានប្រយុទ្ធនឹងសង្គ្រាមដ៏   សាហាវជាមួយអ៊ីស្រាអែល បន្ទាប់ពីការវាយប្រហាររបស់ខ្លួន នៅថ្ងៃទី ០៧ ខែតុលា ឆ្នាំ ២០២៣៕