កងទ័ពឥណ្ឌាបាននិយាយថា ការប៉ះទង្គិចគ្នារវាងកងកម្លាំងសន្តិសុខ និងក្រុមសកម្មប្រយុទ្ធនៅក្នុងតំបន់កាស្មៀរដែលគ្រប់គ្រងដោយឥណ្ឌា បានសម្លាប់ជនសង្ស័យឧទ្ទាមបីនាក់ កាលពីថ្ងៃអាទិត្យ ដែលនេះគឺជាឧប្បត្តិហេតុលើកទី២ នៅក្នុងទឹកដីដែលមានជម្លោះ ក្នុងខែនេះ។

សេចក្តីថ្លែងការណ៍របស់កងទ័ព បានឲ្យដឹងថា ជនសកម្មប្រយុទ្ធបីនាក់ ត្រូវបានសម្លាប់ ក្នុងអំឡុងពេលប្រតិបត្តិការយោធាមួយ នៅក្នុងស្រុក Kishtwar ដែលមានរយៈកម្ពស់ខ្ពស់ បន្ទាប់ពីខ្លួនបានទទួលព័ត៌មានស៊ើបការណ៍សម្ងាត់ «គួរឲ្យទុកចិត្ត» អំពីវត្តមានរបស់ក្រុមឧទ្ទាមនៅក្នុងតំបន់នោះ។

កងទ័ពបានបន្ថែមថា កងកម្លាំងសន្តិសុខ បានរកឃើញអាវុធជាច្រើនពីកន្លែងនោះ។

កាលពីដើមខែនេះ ជនសកម្មប្រយុទ្ធបីនាក់ ត្រូវបានសម្លាប់ នៅក្នុងប្រតិបត្តិការយោធាមួយផ្សេងទៀត នៅក្នុងតំបន់កាស្មៀរដែលគ្រប់គ្រងដោយឥណ្ឌា។

តំបន់កាស្មៀរដែលភាគច្រើនជាមូស្លីម ត្រូវបានបែងចែករវាងឥណ្ឌា និងប៉ាគីស្ថាន ចាប់តាំងពីទទួលបានឯករាជ្យពីការគ្រប់គ្រងរបស់អង់គ្លេស ក្នុងឆ្នាំ ១៩៤៧ ហើយប្រទេសទាំងពីរទាមទារទឹកដីនេះទាំងស្រុង។

ក្រុមឧទ្ទាមបានធ្វើការបះបោរប្រឆាំងនឹងការគ្រប់គ្រងរបស់ឥណ្ឌា ចាប់តាំងពីឆ្នាំ ១៩៨៩ ដោយទាមទារឯករាជ្យភាពរបស់កាស្មៀរ ឬការរួមបញ្ចូលគ្នាជាមួយប៉ាគីស្ថាន៕