កាលពីថ្ងៃអាទិត្យ (ទី២២ ខែកុម្ភៈ ឆ្នាំ២០២៦) គណៈកម្មការអឺរ៉ុបបានទាមទារឲ្យសហរដ្ឋអាមេរិកប្រកាន់ខ្ជាប់នូវលក្ខខណ្ឌនៃកិច្ចព្រមព្រៀងពាណិជ្ជកម្ម រវាងសហភាពអឺរ៉ុប (EU) និងសហរដ្ឋអាមេរិក ដែលបានសម្រេចកាលពីឆ្នាំមុន បន្ទាប់ពីតុលាការកំពូលអាមេរិក បានសម្រេចលុបចោលវិធានការដំឡើងពន្ធសកលរបស់លោកប្រធានាធិបតី Donald Trump ហើយលោកបានឆ្លើយតបជាមួយនឹងការដាក់អត្រាពន្ធថ្មី លើគ្រប់មុខទំនិញ។

គណៈកម្មការដែលចរចាគោលនយោបាយពាណិជ្ជកម្មតំណាងឲ្យរដ្ឋសមាជិកសហភាពអឺរ៉ុបចំនួន ២៧ បានបញ្ជាក់ថា ទីក្រុងវ៉ាស៊ីនតោនត្រូវតែផ្តល់ «ភាពច្បាស់លាស់ទាំងស្រុង» ជុំវិញវិធានការដែលខ្លួនមានបំណងធ្វើ បន្ទាប់ពីមានសេចក្តីសម្រេចរបស់តុលាការ។

បន្ទាប់ពីតុលាការបានលុបចោលពន្ធសកលរបស់លោក Trump កាលពីថ្ងៃទី២០ ខែកុម្ភៈ ប្រធានាធិបតីអាមេរិកបានប្រកាសអត្រាពន្ធបណ្តោះអាសន្នលើគ្រប់ទំនិញទាំងអស់ចំនួន ១០ភាគរយ ដែលបន្ទាប់មកលោក បានដំឡើងដល់ ១៥ភាគរយ នៅមួយថ្ងៃក្រោយមក។

គណៈកម្មការបានសង្កត់ធ្ងន់ថា៖ «ស្ថានភាពពេលនេះ មិនអំណោយផលឡើយដល់ការផ្តល់នូវការធ្វើពាណិជ្ជកម្ម និងការវិនិយោគឆ្លងមហាសមុទ្រអាត្លង់ទិក ប្រកបដោយយុត្តិធម៌ តុល្យភាព និងផ្តល់ផលប្រយោជន៍ឲ្យគ្នាទៅវិញទៅមក ដូចដែលបានព្រមព្រៀងគ្នាដោយភាគីទាំង២ នៅក្នុងសេចក្តីថ្លែងការណ៍រួមដែលកំណត់លក្ខខណ្ឌនៃកិច្ចព្រមព្រៀងពាណិជ្ជកម្មកាលពីឆ្នាំមុន។ កិច្ចព្រមព្រៀង គឺជាកិច្ចព្រមព្រៀងមួយ ពោលគឺជាអ្វីដែលត្រូវតែគោរពតាម»។

គួរបញ្ជាក់ថា កិច្ចព្រមព្រៀងពាណិជ្ជកម្មកាលពីឆ្នាំមុន បានកំណត់អត្រាពន្ធ ១៥ភាគរយរបស់សហរដ្ឋអាមេរិក សម្រាប់ទំនិញភាគច្រើនរបស់សហភាពអឺរ៉ុប លើកលែងតែពន្ធដែលគ្របដណ្តប់លើវិស័យផ្សេងទៀត ដូចជាលើដែកថែបជាដើម។ វាក៏អនុញ្ញាតឲ្យមានការលើកលែងពន្ធផងដែរ លើផលិតផលមួយចំនួនដូចជាយន្តហោះ និងគ្រឿងបន្លាស់។ ហើយសហភាពអឺរ៉ុបបានយល់ព្រមលុបចោលពន្ធនាំចូល លើទំនិញជាច្រើនរបស់សហរដ្ឋអាមេរិក និងលុបចោលការគំរាមកំហែងសងសឹកដោយការយកពន្ធខ្ពស់ជាង៕