ទីភ្នាក់ងារគយ និងការពារព្រំដែន (CBP) របស់សហរដ្ឋអាមេរិក បានឲ្យដឹងថា ខ្លួននឹងបញ្ឈប់ការប្រមូលពន្ធដែលដាក់ក្រោមច្បាប់អំណាចសេដ្ឋកិច្ចបន្ទាន់អន្តរជាតិ (IEEPA) នៅវេលាម៉ោង ១២:០១ព្រឹក ម៉ោងក្នុងស្រុក (ត្រូវនឹង ៥:០១ ម៉ោងសកល) នៅថ្ងៃអង្គារ (ទី២៤ ខែកុម្ភៈ ឆ្នាំ២០២៦) ពោលគឺកន្លងផុត ៣ថ្ងៃបន្ទាប់ពីតុលាការកំពូលសហរដ្ឋអាមេរិក បានប្រកាសថា អត្រាសពន្ធទាំងនោះ គឺខុសច្បាប់។

តាមរយៈសារមួយទៅកាន់អ្នកដឹកជញ្ជូន នៅលើសេវាកម្មផ្ញើសារប្រព័ន្ធដឹកទំនិញ (CSMS) របស់ខ្លួន ទីភ្នាក់ងារនេះបានឲ្យដឹងថា ខ្លួននឹងធ្វើឲ្យលែងដំណើរការកូដពន្ធគយទាំងអស់ដែលជាប់ពាក់ព័ន្ធក្រឹត្យទាក់ទងនឹង IEEPA មុនរបស់លោកប្រធានាធិបតី Donald Trump គិតត្រឹមថ្ងៃអង្គារ។

ការបញ្ឈប់ការប្រមូលពន្ធគយ IEEPA នេះ កើតមានឡើងស្របគ្នានឹងការដាក់អត្រាពន្ធសកលថ្មី ១៥ភាគរយរបស់លោក Trump ក្រោមអំណាចផ្លូវច្បាប់ផ្សេង ដើម្បីជំនួសវិធានាការពន្ធដែលត្រូវបានលុបចោលដោយតុលាការកំពូល កាលពីថ្ងៃសុក្រចុងសប្ដាហ៍កន្លងមក។

យ៉ាងណាក្ដី CBP មិនបានផ្តល់ហេតុផលនោះឡើយថា តើហេតុអ្វីបានជាខ្លួនបន្តប្រមូលពន្ធគយ នៅផែនានា ពោលគឺប៉ុន្មានថ្ងៃបន្ទាប់ពីមានសេចក្ដីសម្រេចរបស់តុលាការកំពូល ហើយជាមួយគ្នានេះ សាររបស់ស្ថាប័ននេះក៏មិនបានផ្តល់ព័ត៌មាន អំពីការសងត្រឡប់វិញដែលអាចកើតមានសម្រាប់អ្នកនាំចូលនោះដែរ។

សារនេះបានកត់សម្គាល់ថា ការផ្អាកការប្រមូលពន្ធមិនប៉ះពាល់ដល់ពន្ធផ្សេងទៀតដែលដាក់ដោយលោក Trump ទេ ក្នុងនោះរួមទាំងអត្រាពន្ធដែលស្ថិតនៅក្រោមច្បាប់សន្តិសុខជាតិមាត្រា ២៣២ និងច្បាប់ស្តីពីការអនុវត្តពាណិជ្ជកម្មមិនយុត្តិធម៌មាត្រា ៣០១៕