ព្រិលធ្លាក់ខ្លាំង និងកម្លាំងខ្យល់ដ៏ខ្លាំងក្លា បានបក់បោកឆ្លងកាត់ភាគឦសាន និងភាគកណ្តាលអាត្លង់ទិក កាលពីថ្ងៃអាទិត្យ (ទី២២ ខែកុម្ភៈ ឆ្នាំ២០២៦) ខណៈដែលព្យុះព្រិលនៅចុងខែកុម្ភៈនេះ បានធ្វើឲ្យជើងហោះហើរ និងសេវកម្មផ្លូវដែកត្រូវផ្អាក ហើយតំបន់នេះបានត្រៀមប្រឈមនឹងព្យុះដ៏ខ្លាំងមួយ។

ព្រិលកម្ពស់ជាង ០,៦ម៉ែត្រ ត្រូវបានគេរំពឹងថា នឹងធ្លាក់នៅតំបន់ខ្លះនៃរដ្ឋ New England ហើយតំបន់ទីក្រុង New York របស់សហរដ្ឋអាមេរិក អាចមានយ៉ាងហោចណាស់ ៤៥,៧២សង់ទីម៉ែត្រ។

កាលពីល្ងាចថ្ងៃទី២២ ខែកុម្ភៈ អ្នកស្រុកភាគច្រើននៅតែក្នុងផ្ទះ ដោយធ្វើតាមការណែនាំរបស់មន្ត្រីប្រចាំរដ្ឋ និងមូលដ្ឋាន ដែលបានព្រមានថា ស្ថានភាពនឹងកាន់តែអាក្រក់ទៅៗរហូតដល់យប់។ យោងតាមសេវាអាកាសធាតុជាតិ បានឲ្យដឹងថា ព្យុះនេះត្រូវបានគេរំពឹងថា នឹងឡើងដល់កម្រិតខ្លាំងបំផុតរបស់វានាពេលយប់ ដោយមានព្រិលធ្លាក់កម្ពស់ ៥,០៨សង់ទីម៉ែត្រ ឬខ្ពស់ជាងនេះ ក្នុងរយៈពេលមួយម៉ោង។

មនុស្សជាង ៣៥លាននាក់ស្ថិតនៅក្រោមការព្រមាន អំពីការមានព្យុះព្រិលដ៏ខ្លាំងក្លា។ ព្រិលកម្ពស់ជាង ០,៣ម៉ែត្រ ត្រូវបានគេរំពឹងថា នឹងធ្លាក់តាមបណ្តោយឆ្នេរភាគខាងកើត ពីឆ្នេរសមុទ្ររដ្ឋ Virginia ដល់ភាគខាងត្បូងរដ្ឋ Maine។ ហើយព្រិលកម្ពស់យ៉ាងហោចណាស់ ០,៤៦ម៉ែត្រ ត្រូវបានគេរំពឹងថា នឹងធ្លាក់ចាប់ពីទីក្រុង Atlantic City រដ្ឋ New Jersey រហូតដល់ទីក្រុង Boston ខណៈគេរំពឹងថា នឹងមានព្រិលធ្លាក់ជាង ០,៦ម៉ែត្រ នៅតាមតំបន់នានានៃរដ្ឋ Massachusetts និង Rhode Island។

ប្រសិនបើព្រិលធ្លាក់នៅទីក្រុង New York មានកម្ពស់ ៤៥,៧២សង់ទីម៉ែត្រ ដូចការព្យាករនោះ ព្យុះនេះនឹងមានកម្រិតខ្លាំងបំផុត ចាប់តាំងពីឆ្នាំ២០១៦ នៅពេលដែលព្យុះព្រិលដ៏ខ្លាំងមួយ បានធ្លាក់កម្ពស់ ៦៩,៨៥សង់ទីម៉ែត្រ នៅឧទ្យាន Central Park។ សិស្សសាលារដ្ឋចំនួន ៩០០,០០០នាក់របស់ទីក្រុងនេះត្រូវបានជួបប្រទះនឹងថ្ងៃព្រិលធ្លាក់ដ៏កម្រមួយ នាថ្ងៃទី២៣ ខែកុម្ភៈ ដោយសូម្បីតែថ្នាក់រៀនពីចម្ងាយ (តាមអនឡាញ) ក៏ត្រូវបានលុបចោលដែរ។ គួរបញ្ជាក់ថា ព្យុះព្រិលបានធ្វើឲ្យប៉ះពាល់ដល់ការដឹកជញ្ជូនសាធារណៈ នៅតាមតំបន់នានានៃតំបន់នេះរួចហើយ៕