នៅថ្ងៃចន្ទនេះ កងកម្លាំងសហរដ្ឋអាមេរិក បានចាប់ផ្តើមដកទ័ពរបស់ខ្លួនចេញពីមូលដ្ឋានទ័ពធំបំផុតរបស់ពួកគេ នៅតំបន់ភាគឦសាន ប្រទេសស៊ីរី ដែលជាផ្នែកមួយនៃការចាកចេញទ្រង់ទ្រាយធំ ស្របពេលរដ្ឋាភិបាលសម្ព័ន្ធរបស់សហរដ្ឋអាមេរិកនៅទីក្រុងដាម៉ាស បង្រួបបង្រួមការគ្រប់គ្រង ។ នេះបើយោងតាមប្រភសន្តិសុខ និងយោធាស៊ីរី ។

ក្រុមសាក្សីនិយាយថា រថយន្តរាប់សិបគ្រឿង ដោយរថយន្តខ្លះដឹករថពាសដែក បានចាកចេញពីមូលដ្ឋានទ័ពស្ថិតក្នុងទីក្រុង Qasrak ខេត្ត Hasakah នាព្រឹកថ្ងៃចន្ទនេះ ។

រូបភាពវីដេអូឃ្លីបរបស់ទីភ្នាក់ងារព័ត៌មានរ៉យទ័រ ឃើញរថយន្តធំ ធ្វើដំណើរលើផ្លូវហាយវ៉េ នៅតំបន់ជាយក្រុង Qamishli ។

ទីបញ្ជាការកណ្តាលយោធាសហរដ្ឋអាមេរិក ពុំបានឆ្លើយតបភ្លាមៗនោះទេចំពោះសំណើរសុំសេចក្តីអត្ថាធិប្បាយតាមអ៊ីម៉ែល ។

ការដកទ័ពទាំងស្រុងចេញពីមូលដ្ឋានយោធានៅទីក្រុង Qasrak នឹងទុកឲ្យក្រុមចម្រុះដឹកនាំដោយសហរដ្ឋអាមេរិក បន្តឈរជើងក្នុងមូលដ្ឋានទ័ពនៅទីក្រុង Rmelan ស្ថិតនៅជិតព្រំដែនអ៊ីរ៉ាក់ ។

ទីក្រុង Qasrak គឺជាមជ្ឈមណ្ឌលដ៏សំខាន់សម្រាប់ក្រុមចម្រុះសកលដឹកនាំដោយសហរដ្ឋអាមេរិក ក្នុងការប្រយុទ្ធជាមួយក្រុមរដ្ឋអ៊ិស្លាម នៅប្រទេសស៊ីរី ជាទីដែលទាហានអាមេរិក បានដាក់ពង្រាយកាលពីរយៈពេល ១ទសវត្សរ៍មុន ដោយចាប់ដៃគូជាមួយកងកម្លាំងប្រជាធិបតេយ្យស៊ីរីដឹកនាំដោយក្រុមឃឺដ ប្រឆំាងនឹងក្រុមជីហាដមួយនេះ ៕