អ្នកនាំពាក្យក្រសួងការបរទេសអ៊ីរ៉ង់លោក Esmaeil Baghaei និយាយនៅថ្ងៃចន្ទនេះថា ការដាក់សម្ពាធលើអ៊ីរ៉ង់ឲ្យទទួលយកឯកតោភាគីការទាមទាររបស់សហរដ្ឋអាមេរិក ច្បាស់ណាស់ថា មិនផ្តល់លទ្ធផលអ្វីឡើយ ។

រដ្ឋមន្រ្តីការបរទេសអូម៉ង់លោក Badr Albusaidi និយាយកាលពីថ្ងៃអាទិត្យថា អ៊ីរ៉ង់ និងសហរដ្ឋអាមេរិក នឹងចូលរួមជំនួបនុយក្លេអ៊ែរជុំទី ៣ នៅថ្ងៃព្រហស្បតិ៍ខាងមុខនេះ ក្នុងទីក្រុងហ្សឺណែវ ប្រទេសស្វីស ស្របពេលមានក្តីបារម្ភលើហានិភ័យនៃជម្លោះយោធារវាងប្រទេសបច្ចាមិត្តទាំង ២ ។

សហរដ្ឋអាមេរិកបានបង្កើនវត្តមានយោធារបស់ខ្លួននៅតំបន់មជ្ឈិមបូព៌ា ក្នុងនោះប្រធានាធិបតីសហរដ្ឋអាមេរិកលោក Donald Trump ព្រមានថា រឿងអាក្រក់នឹងកើតឡើង បើសិនជាកិច្ចព្រមព្រៀងពុំឈានដល់ ដើម្បីស្រាយជម្លោះលើកម្មវិធីនុយក្លេអ៊ែរអ៊ីរ៉ង់ ។

អ៊ីរ៉ង់នឹងផ្តល់សម្បទានថ្មីលើកម្មវិធីនុយក្លេអ៊ែររបស់ខ្លួន ដើម្បីឈានដល់កិច្ចព្រមព្រៀង ដរាបណាវារួមបញ្ចូលការដកទណ្ឌកម្មសេដ្ឋកិច្ច និងការទទួលស្គាល់សិទ្ធិរបស់ទីក្រុងតេអេរ៉ង់ ក្នុងការចម្រាញ់សារធាតុអ៊ុយរ៉ានីញ៉ូមដោយសន្តិវិធី ។

ទោះបីជាយ៉ាងណាក៏ដោយ ទីក្រុងវ៉ាស៊ីនតោនព្យាយាមពង្រីកកិច្ចប្រជុំហួសបញ្ហានុយក្លេអ៊ែរ រហូតដល់កម្មវិធីមីស៊ីលអ៊ីរ៉ង់ និងការគាំទ្រក្រុមប្រដាប់អាវុធក្នុងតំបន់របស់ពួកគេ ។

អ៊ីរ៉ង់បានច្រានចោលជាសាធារណៈចំពោះការទាមទារនេះ បើទោះបីជាប្រភពនិយាយប្រាប់ទីភ្នាក់ងារព័ត៌មានរ៉យទ័រថា មិនដូចមីស៊ីលទេ ការគាំទ្រក្រុមប្រដាប់អាវុធ អាចមិនមែនជាបន្ទាត់ក្រហមសម្រាប់ទីក្រុងតេអេរ៉ង់ ៕