ប្រទេសសូម៉ាលី បានស្នើបន្តកិច្ចព្រមព្រៀងថ្មីដែលអនុញ្ញាតឲ្យសហរដ្ឋអាមេរិកមានសិទ្ធិចូលប្រើប្រាស់កំពង់ផែ និងអាកាសយានដ្ឋានរបស់ខ្លួន សម្រាប់គោលបំណងយោធា ដោយនេះគឺជាការឆ្លើយតបទៅនឹងការមានសំណើស្រដៀងគ្នានេះ ពីសំណាក់តំបន់ផ្ដាច់ខ្លួនសូម៉ាលីឡែន (Somaliland)។

ជាការឆ្លើយតបទៅនឹងសំណួរនានា រដ្ឋមន្ត្រីក្រសួងការបរទេស លោក Ali Mohamed Omar Balcad បាននិយាយថា៖ «ប្រទេសសូម៉ាលី និងសហរដ្ឋអាមេរិក មាននូវក្របខ័ណ្ឌសហប្រតិបត្តិការយូរអង្វែង ក្នុងនោះរួមទាំងកិច្ចព្រមព្រៀងឆ្នាំ១៩៨០ ផងដែរ ស្តីពីសិទ្ធិចូលប្រើប្រាស់កំពង់ផែ និងអាកាសយានដ្ឋាន សម្រាប់គោលបំណងយោធារបស់សហរដ្ឋអាមេរិក។ រដ្ឋាភិបាលសហព័ន្ធ ថ្មីៗនេះបានស្នើបន្តកិច្ចព្រមព្រៀងនោះ ដែលនៅតែជាបណ្តាញសមស្រប និងស្របច្បាប់ សម្រាប់ការមានកិច្ចសហប្រតិបត្តិការសន្តិសុខណាមួយ»។

មហាអំណាចបរទេស រួមទាំងសហរដ្ឋអាមេរិក កំពុងលើកកម្ពស់កិច្ចសហប្រតិបត្តិការយោធាកាន់តែស៊ីជម្រៅជាមួយប្រទេសសូម៉ាលី ដែលត្រូវបានទាញដោយទីតាំងយុទ្ធសាស្ត្ររបស់ខ្លួន នៅច្រកទ្វារទៅកាន់សមុទ្រក្រហម និងទីតាំងជិតនឹងប្រទេសយេម៉ែន ជាកន្លែងដែលពួកសកម្មប្រយុទ្ធហ៊ួធីគំរាមកំហែងដល់ផ្លូវដឹកជញ្ជូនសំខាន់ៗ។

ក្នុងរយៈពេលប៉ុន្មានទសវត្សរ៍ថ្មីៗនេះ ការចូលរួមរបស់សហរដ្ឋអាមេរិកជាមួយប្រទេសនេះ បានផ្តោតលើប្រតិបត្តិការប្រឆាំងភេរវកម្មដែលកំណត់គោលដៅលើយុទ្ធជនរបស់ក្រុមបះបោរ al-Shabaab ដែលមានទំនាក់ទំនងជាមួយក្រុមអាល់កៃដា និង ISIS (រដ្ឋឥស្លាម)៕