រដ្ឋអាជ្ញានៅតុលាការព្រហ្មទណ្ឌអន្តរជាតិ (ICC) នៅថ្ងៃចន្ទ (ទី២៣ ខែកុម្ភៈ ឆ្នាំ២០២៦) នេះ បានលើកឡើងថា អតីតប្រធានាធិបតីហ្វីលីពីន លោក Rodrigo Duterte គឺជា «បុគ្គលសំខាន់» ក្នុងយុទ្ធការដែលសម្លាប់មនុស្សរាប់ពាន់នាក់ អំឡុងពេលលោកកាន់អំណាច ខណៈដែលពួកគេបានជំរុញឲ្យការកាត់ក្តីលើរូបលោកបន្តទៅមុខ។

រដ្ឋអាជ្ញានៅតុលាការឧក្រិដ្ឋកម្មសង្គ្រាមដែលមានមូលដ្ឋាននៅទីក្រុងឡាអេ ប្រទេសហូឡង់ បានចោទប្រកាន់លោក Duterte ពីបទឃាតកម្ម ៣ករណី ជាឧក្រិដ្ឋកម្មប្រឆាំងនឹងមនុស្សជាតិ ពាក់ព័ន្ធនឹងជនរងគ្រោះរាប់សិបនាក់ ដែលអ្នកចោទប្រកាន់ បញ្ជាក់ថា គ្រាន់តែជាតួលេខតិចតូចនៃចំនួនអ្នកស្លាប់ពិតប្រាកដនៅក្នុងការបង្ក្រាបរបស់លោក លើបុគ្គលដែលត្រូវបានចោទប្រកាន់ជាអ្នកប្រើប្រាស់គ្រឿងញៀន និងឧក្រិដ្ឋជន។

លោករដ្ឋអាជ្ញា Mame Niang បានប្រកាសនៅពេលបើកសវនាការមុនការកាត់ក្តីថា៖ «អ្វីដែលហៅថា សង្គ្រាមប្រឆាំងគ្រឿងញៀនរបស់លោក Duterte បានបណ្តាលឲ្យមានការសម្លាប់ជនស៊ីវិលរាប់ពាន់នាក់ ហើយជនរងគ្រោះទាំងនេះជាច្រើននាក់ គឺជាកុមារ»។ លោកបានបន្ថែមថា៖ «លោក Duterte ត្រូវតែទទួលខុសត្រូវ ហើយករណីនេះគួរតែត្រូវបានបញ្ជាក់ ដើម្បីឲ្យមានដំណើរការកាត់ក្តី»។

តាមច្បាប់របស់ ICC ចៅក្រមនឹងត្រូវបញ្ជាក់ការចោទប្រកាន់ មុនពេលសំណុំរឿងអាចបញ្ជូនទៅកាត់ក្តីបាន។ លោក Duterte បានកាន់តំណែងជាប្រធានាធិបតីហ្វីលីពីនពីឆ្នាំ២០១៦ ដល់ឆ្នាំ២០២២ ហើយត្រូវបានចាប់ខ្លួន និងនាំខ្លួនទៅកាន់ទីក្រុងឡាអេកាលពីខែមីនាឆ្នាំមុន។

យោងតាមរដ្ឋអាជ្ញា បានឲ្យដឹងថា លោក Duterte បានបង្កើត ផ្តល់មូលនិធិ និងបំពាក់អាវុធដល់ក្រុមសម្លាប់ ដើម្បីកំណត់គោលដៅ និងសម្លាប់មនុស្សដែលត្រូវបានចោទប្រកាន់ថា ជាអ្នកជួញដូរ និងប្រើប្រាស់គ្រឿងញៀន។ លោក Duterte បានទទូចជាយូរមកហើយថា លោកបានណែនាំនគរបាលឲ្យសម្លាប់តែក្នុងករណីការការពារខ្លួនប៉ុណ្ណោះ ហើយតែងតែការពារការបង្ក្រាបជានិច្ច៕