ភ្នំពេញ៖ ស្ថានទូតបារាំងប្រចាំកម្ពុជា នាល្ងាចថ្ងៃទី២១មីនាម្សិលមិញ បានរៀបចំពិធី អបអរខួប៣០ឆ្នាំ នៃការបង្កើតវិទ្យាស្ថានបារាំងនៅកម្ពុជា។ ពិធីនេះបានប្រព្រឹត្តទៅក្រោមវត្តមានរបស់លោក ហ្សាក់ ប៉ឺឡេ ឯកអគ្គរដ្ឋទូតបារាំងប្រចាំកម្ពុជា ឯកឧត្តមបណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ឯកឧត្តមបណ្ឌិត ឈីវ យីស៊ាង រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ និងជាអ្នកសម្របសម្រួលជាតិកម្ពុជាអមអង្គការអន្តរជាតិហ្វ្រង់កូហ្វូនី(OIF) និងភ្ញៀវកិត្តិយសជាច្រើនរូបទៀត។
វិទ្យាស្ថានបារាំងនៅកម្ពុជា (IFC) គឺជាស្ថាប័នរបស់ក្រសួងការបរទេសបារាំង ដែលមានបេសកកម្មលើកស្ទួយកិច្ចសហប្រតិបត្តិការ និងសកម្មភាពវប្បធម៌នៅក្រៅប្រទេសបារាំង។ ស្ថាប័ននេះបានដើរតួនាទីសំខាន់ណាស់ក្នុងការផ្លាស់ប្តូរ និងកិច្ចសហប្រតិបត្តិការរវាងប្រទេសបារាំង និងកម្ពុជាក្នុងវិស័យវប្បធម៌ សិល្បៈ ការអប់រំ និងការបណ្តុះបណ្តាល។ ក្នុងន័យនេះ វិទ្យាស្ថានបារាំងបង្ហាញជូនសាធារណជននូវកម្មវិធីផ្សេងៗ ដូចជាការតាំងពិព័រណ៍ ការបញ្ចាំងភាពយន្ត ការប្រគុំតន្ត្រី សន្និសីទ ។ល។ ក្រៅពីការផ្សព្វផ្សាយវប្បធម៌បារាំង វិទ្យាស្ថានបានបង្កើតគម្រោងជាច្រើនជាមួយដៃគូក្នុងស្រុកនៅកម្ពុជា ដើម្បីលើកកម្ពស់ការអភិវឌ្ឍន៍ និងការផ្លាស់ប្តូរវប្បធម៌។
លោកឯកអគ្គរដ្ឋទូតបារាំងបានរំលឹកថា កាលពីដើម វិទ្យាស្ថានបារាំងនៅកម្ពុជា មានឈ្មោះថា ជាសម្ព័ន្ធភាពបារាំង ដែលប្រជាជននៅទីក្រុងភ្នំពេញជាច្រើនតែងហៅថា សាលាអាលីយ៉ង់។ នៅពាក់កណ្តាលទសវត្សរ៍ឆ្នាំ១៩៩០ សម្ព័ន្ធភាពបារាំងបានក្លាយទៅជាមជ្ឈមណ្ឌលវប្បធម៌បារាំង ហើយបន្ទាប់មក នៅឆ្នាំ២០១១ បានដាក់ឈ្មោះថាជាវិទ្យាស្ថានបារាំងនៅកម្ពុជា។ ប៉ុន្មានឆ្នាំមកនេះ វិទ្យាស្ថានបារាំងបានក្លាយទៅជាតួអង្គសំខាន់មួយក្នុងការលើកកម្ពស់ភាសា និងវប្បធម៌បារាំង ក៏ដូចជាវប្បធម៌កម្ពុជាផងដែរ។ លោកឯកអគ្គរដ្ឋទូតបានមានប្រសាសន៍ថា ពិធីរំលឹកខួប៣០នេះត្រូវបានប្រារព្វធ្វើដំណាលគ្នាជាមួយនឹងការអបអរទិវាហ្រ្វង់កូហ្វូនីអន្តរជាតិ ដែលតែងរៀបចំឡើងជារៀងរាល់ឆ្នាំនៅថ្ងៃទី២០ខែមីនានៅតាមបណ្តាប្រទេសប្រើប្រាស់ភាសាបារាំង។
ថ្លែងនៅក្នុងកម្មវិធីនោះដែរ ឯកឧត្តមបណ្ឌិតសភាចារ្យ ហង់ ជួន ណារ៉ុន បានលើកឡើងថា ក្នុងនាមឯកឧត្តមផ្ទាល់ និងក្រសួងអប់រំ យុវជន និងកីឡា ឯកឧត្តមបានសម្តែងសេចក្តីសោមនស្សរីករាយចូលរួមអបអរសាទរខួបលើកទី៣០ នៃការបង្កើតវិទ្យាស្ថានបារាំងនៅកម្ពុជា ដែលត្រូវបានរៀបចំឡើងដោយមានសកម្មភាព និងព្រឹត្តិការណ៍វប្បធម៌ជាច្រើន។ ឯកឧត្តមរដ្ឋមន្រ្តីបានសម្តែងការពេញចិត្តចំពោះទំនាក់ទំនងមិត្តភាព និងការឲ្យតម្លៃគ្នាទៅវិញទៅមករវាងប្រទេសកម្ពុជា និងប្រទេសបារាំងនៅក្នុងវិស័យអប់រំ និងការផ្លាស់ប្តូរវប្បធម៌ ដែលផ្តោតលើភាពចម្រុះនៃវប្បធម៌ គុណតម្លៃនៃការសន្ទនា ស្មារតីនៃទំនើបកម្ម និងការបើកចំហ។ ក្រៅពីនេះ ឯកឧត្តមរដ្ឋមន្រ្តីក៏បានបញ្ជាក់ឡើងវិញពីការប្តេជ្ញាចិត្តរបស់ឯកឧត្តមក្នុងការធ្វើការជាមួយស្ថាប័ន និងរដ្ឋាភិបាលបារាំង ដើម្បីពង្រឹងចំណងមិត្តភាព និងកិច្ចសហប្រតិបត្តិការបារាំង-កម្ពុជានៅក្នុងវិស័យអប់រំ៕ អត្ថបទ៖ បាន ចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
