សមាជិកសភាជាន់ខ្ពស់មួយរូបរបស់សហភាពអឺរ៉ុបបាននិយាយកាលពីថ្ងៃចន្ទដើមសប្ដាហ៍នេះថា  សភាសហភាពអឺរ៉ុបបានសម្រេចចិត្តកាលពីថ្ងៃចន្ទ២៣កុម្ភៈសប្ដាហ៍នេះ ពន្យារពេលការបោះឆ្នោតលើកិច្ចព្រមព្រៀងពាណិជ្ជកម្មរបស់សហភាពអឺរ៉ុបជាមួយសហរដ្ឋអាមេរិក ដោយសារតែការដាក់ពន្ធនាំចូលសរុបចំនួន ១៥% របស់ប្រធានាធិបតីអាមេរិក Donald Trump បន្ទាប់ពីតុលាការកំពូលបានលុបចោលពន្ធសកលកាលពីកន្លងទៅរបស់លោក។

សភាអឺរ៉ុបបាននិងកំពុងពិភាក្សាអំពីសំណើច្បាប់ដើម្បីលុបចោលពន្ធនាំចូលជាច្រើនរបស់សហភាពអឺរ៉ុបលើទំនិញអាមេរិក ជាផ្នែកសំខាន់មួយនៃកិច្ចព្រមព្រៀងដែលបានធ្វើឡើងនៅទីក្រុង ធើនប៊ែរី (Turnberry) នៃដែនដី ស្កុតឡិន កាលពីចុងខែកក្កដា ២០២៥ ក៏ដូចជាបន្តការមិនយកពន្ធសម្រាប់បង្កងអាមេរិក ដែលដំបូងឡើយបានព្រមព្រៀងជាមួយលោក Trump ក្នុងឆ្នាំ២០២០។ សំណើទាំងនេះតម្រូវឱ្យមានការយល់ព្រមពីសភា និងរដ្ឋាភិបាលសហភាពអឺរ៉ុប។

គណៈកម្មាធិការពាណិជ្ជកម្មរបស់សភាត្រូវបានគ្រោងនឹងបោះឆ្នោតនៅថ្ងៃអង្គារ២៤កុម្ភៈសប្ដាហ៍នេះ ប៉ុន្តែការបោះឆ្នោតនោះត្រូវបានពន្យារពេល ដែលជាការផ្អាកលើកទីពីរដោយក្រុមសមាជិកសភារបស់សហភាពអឺរ៉ុប។

កន្លងមកក្រុមសមាជិកសភារបស់ប្លុកនេះ ធ្លាប់បានបញ្ឈប់ការងាររបស់ពួកគេលើកិច្ចព្រមព្រៀងនេះ ដើម្បីតវ៉ាចំពោះការទាមទាររបស់លោក Trump ក្នុងការទទួលបានកោះ Greenland និងការគំរាមដំឡើងពន្ធបន្ថែមលើសម្ព័ន្ធមិត្តអឺរ៉ុប ដែលប្រឆាំងនឹងផែនការរបស់លោក៕