អតីតប្រធានាធិបតីកូរ៉េខាងត្បូងលោក Yoon Suk Yeol ដែលត្រូវបានកាត់ទោសឱ្យជាប់ពន្ធនាគារអស់មួយជីវិត បន្ទាប់ពីត្រូវបានរកឃើញថាមានទោសពីបទដឹកនាំការបះបោរ ក្រោយការប្រកាសច្បាប់អាជ្ញាសឹកនៅថ្ងៃទី ៣ ធ្នូ ឆ្នាំ២០២៤ បានប្តឹងឧទ្ធរណ៍ប្រឆាំងនឹងសេចក្តីសម្រេចរបស់តុលាការដំបូងនៅថ្ងៃអង្គារ ២៤កុម្ភៈសប្ដាហ៍នេះ។

ក្រុមមេធាវីរបស់លោក Yoon បាននិយាយថា ខ្លួនបានដាក់សេចក្តីជូនដំណឹងអំពីការប្តឹងឧទ្ធរណ៍ប្រឆាំងនឹងសាលក្រមនេះ។

ក្រុមមេធាវីបាននិយាយនៅក្នុងសេចក្តីថ្លែងការណ៍មួយថា ពួកលោកបានដាក់ពាក្យបណ្តឹងឧទ្ធរណ៍នៅថ្ងៃនេះក្នុងសំណុំរឿងទាក់ទងនឹងការចោទប្រកាន់ពីបទដឹកនាំការបះបោរ។ពួកលោកនឹងមិននៅស្ងៀមចំពោះការចោទប្រកាន់ហួសហេតុរបស់ក្រុមប្រឹក្សាពិសេស ហេតុផលផ្ទុយគ្នានៅក្នុងសវនាការដំបូង ដែលបានធ្វើឡើងលើមូលដ្ឋាននោះ និងឆុតឆាកនយោបាយជុំវិញសំណុំរឿងនេះ នោះទេ។

សេចក្តីថ្លែងការណ៍បានបន្តថា ពួកលោកជឿជាក់ថាពួកលោកមានកាតព្វកិច្ចក្នុងការកត់ត្រាបញ្ហានៅក្នុងសាលក្រមនេះយ៉ាងច្បាស់មិនត្រឹមតែនៅក្នុងកំណត់ត្រារបស់តុលាការប៉ុណ្ណោះទេ ប៉ុន្តែថែមទាំងនៅក្នុងកំណត់ត្រាប្រវត្តិសាស្ត្រផងដែរ។

ក្រោមការទទួលខុសត្រូវនោះ ពួកលោកមានបំណងបង្ហាញពីកំហុសក្នុងការស្វែងរកការពិត និងការអនុវត្តច្បាប់ខុសដែលមាននៅក្នុងសេចក្តីសម្រេចរបស់សាលាដំបូង៕