ប្រធានាធិបតី លោក Donald Trump កាលពីថ្ងៃចន្ទ ទី២៣ ខែកុម្ភៈ បានច្រានចោលរបាយការណ៍ដែលថាមន្ត្រីយោធាជាន់ខ្ពស់សហរដ្ឋអាមេរិកបានព្រមានអំពីហានិភ័យនៃប្រតិបត្តិការទ្រង់ទ្រាយធំលើប្រទេសអ៊ីរ៉ង់ ដោយនិយាយថាទីក្រុងវ៉ាស៊ីនតោននឹង «យកឈ្នះលើទីក្រុងតេអេរ៉ង់បានយ៉ាងងាយស្រួល» នៅក្នុងសង្គ្រាមណាមួយ។ ប្រព័ន្ធផ្សព្វផ្សាយអាមេរិក បានរាយការណ៍ថាឧត្តមសេនីយ៍ Dan Caine ប្រមុខនាយសេនាធិការចម្រុះ បានព្រមានអំពីហានិភ័យផ្សេងៗទាក់ទងនឹងការវាយប្រហារលើអ៊ីរ៉ង់។

ប៉ុន្តែលោក Trump បាននិយាយនៅលើបណ្តាញសង្គម Truth របស់លោកថា វា «មិនត្រឹមត្រូវ១០០ភាគរយនោះទេ» ដែល លោក Caine «ប្រឆាំងនឹងយើងក្នុងការធ្វើសង្គ្រាមជាមួយអ៊ីរ៉ង់»។

លោក Trump បានសរសេរថា «ឧត្តមសេនីយ៍ Caine ក៏ដូចយើងទាំងអស់គ្នាដែរ មិនចង់ឃើញសង្គ្រាមទេ ប៉ុន្តែប្រសិនបើការសម្រេចចិត្តត្រូវបានធ្វើឡើងលើការប្រឆាំងនឹងអ៊ីរ៉ង់ក្នុងកម្រិតយោធា វាគឺជាគំនិតរបស់លោកថាវានឹងក្លាយជាអ្វីមួយដែលយកឈ្នះយ៉ាងងាយស្រួល»។ កាសែត Washington Post បាននិយាយថា លោក Caine បានសម្តែងការព្រួយបារម្ភនៅសេតវិមាន និងមន្ទីរបញ្ចកោណថា កង្វះគ្រាប់រំសេវ និងកង្វះការគាំទ្រពីសម្ព័ន្ធមិត្តអាចបង្កើនគ្រោះថ្នាក់ដល់បុគ្គលិកអាមេរិក។

អ្នកចរចាដ៏ស្វាហាប់របស់លោក Trump គឺលោក Steve Witkoff និងកូនប្រសារប្រុសរបស់លោក គឺលោក Jared Kushner ក៏បានជំរុញឱ្យលោកប្រធានាធិបតីផ្អាកការវាយប្រហារ និងផ្តល់ឱកាសចំពោះផ្នែកការទូត នេះបើយោងតាមការចុះផ្សាយរបស់សារព័ត៌មាន Axios។

ទោះជាយ៉ាងណា ប្រធានាធិបតីអាមេរិកបានចោទប្រកាន់ប្រព័ន្ធផ្សព្វផ្សាយនេះថាបានសរសេរ «មិនត្រឹមត្រូវ និងដោយចេតនា»។