កាលពីថ្ងៃចន្ទ ទី២៣ ខែកុម្ភៈ ទីក្រុងវ៉ាស៊ីនតោនបានចោទប្រកាន់ប្រទេសចិនពីការពង្រីកឃ្លាំងអាវុធនុយក្លេអ៊ែររបស់ខ្លួន ហើយបានអះអាងថា ទីក្រុងប៉េកាំងបានធ្វើតេស្តនុយក្លេអ៊ែរជាសម្ងាត់ ដោយទាមទារជាថ្មីម្តងទៀតថាវាជាផ្នែកមួយនៃសន្ធិសញ្ញាគ្រប់គ្រងអាវុធនាពេលអនាគត។

ទីក្រុងវ៉ាស៊ីនតោនបាននិយាយថា ការផុតកំណត់នៅដើមខែនេះនៃសន្ធិសញ្ញា New START ជាសន្ធិសញ្ញាចុងក្រោយរវាងប្រទេសមហាអំណាចនុយក្លេអ៊ែរកំពូលៗ មានសហរដ្ឋអាមេរិក និងរុស្ស៊ី បានបង្ហាញពីលទ្ធភាពក្នុងការសម្រេចបាននូវ «កិច្ចព្រមព្រៀងកាន់តែប្រសើរ» រួមទាំងទីក្រុងប៉េកាំងផងដែរ។ ប្រទេសចិនបានបដិសេធជាសាធារណៈនូវការអំពាវនាវឱ្យចូលរួមក្នុងការចរចាស្តីពីសន្ធិសញ្ញាត្រីភាគីថ្មី។

លោក Christopher Yeaw ឧបការីរដ្ឋមន្ត្រីការបរទេសសហរដ្ឋអាមេរិកទទួលបន្ទុកការគ្រប់គ្រងអាវុធនិងមិនរីកសាយអាវុធ បាននិយាយក្នុងសន្និសីទសារព័ត៌មានស្តីពីការរំសាយអាវុធនៅទីក្រុងហ្សឺណែវថា សន្ធិសញ្ញា New START មានចំណុចខ្វះខាតច្រើន។ លោកបាននិយាយថា «ប្រហែលជាចំណុចខ្វះខាតធំបំផុតរបស់វាគឺថា សន្ធិសញ្ញា New Start មិនបានរាប់បញ្ចូលការបង្កើតអាវុធនុយក្លេអ៊ែរដែលមិនធ្លាប់មានពីមុនមក ដោយចេតនា ឆាប់រហ័ស និងមិនច្បាស់លាស់ដោយប្រទេសចិន»។ លោកបានចោទប្រកាន់ថា «ទោះបីជាមានការអះអាងផ្ទុយពីនេះក៏ដោយ ប្រទេសចិនបានពង្រីកឃ្លាំងអាវុធនុយក្លេអ៊ែររបស់ខ្លួនដោយចេតនា និងដោយគ្មានការរឹតត្បិត គ្មានតម្លាភាព ឬការចង្អុលបង្ហាញណាមួយអំពីបំណង ឬចំណុចបញ្ចប់របស់ប្រទេសចិន»។

ទាំងរុស្ស៊ី និងសហរដ្ឋអាមេរិក មានអាវុធនុយក្លេអ៊ែរជាង ៥.០០០ គ្រាប់ នេះបើយោងតាមក្រុមយុទ្ធនាការដែលឈ្នះពានរង្វាន់ណូបែលសន្តិភាព ICAN។ ប៉ុន្តែសន្ធិសញ្ញា New START ដែលផុតកំណត់នៅថ្ងៃទី ៥ ខែកុម្ភៈ បានរឹតត្បិតសហរដ្ឋអាមេរិក និងរុស្ស៊ី ឲ្យមានក្បាលគ្រាប់នុយក្លេអ៊ែរ១.៥៥០គ្រាប់ ដែលត្រូវដាក់ពង្រាយសម្រាប់ភាគីម្ខាងៗ ជាចំនួនដែលទីក្រុងវ៉ាស៊ីនតោននិយាយថា ប្រទេសចិនកំពុងមានការកើនឡើងងឆាប់រហ័ស។