ព្យុះព្រិលដ៏ខ្លាំងក្លាមួយបានទម្លាក់ព្រិលកម្រាស់ជាង ៧៦សង់ទីម៉ែត្រ នៅទូទាំងផ្នែកខ្លះនៃភាគឦសានសហរដ្ឋអាមេរិក កាលពីថ្ងៃចន្ទ (២៣ កុម្ភៈ) ដោយនាំឱ្យការធ្វើដំណើរស្ទើរតែជាប់គាំងសម្រាប់ប្រជាជនរាប់លាននាក់ ខណៈស្ថានភាពដ៏អាក្រក់នេះបាននាំឱ្យអាជ្ញាធរបិទផ្លូវថ្នល់ បិទសេវាកម្មរថភ្លើង ហើយបង្ខំឱ្យលុបចោល និងពន្យារពេលជើងហោះហើរសរុបជិតប្រហែល ១ម៉ឺនជើង។

ផ្ទះសម្បែង និងអាជីវកម្មរាប់សិបម៉ឺនកន្លែងបានដាច់ចរន្តអគ្គិសនី ហើយមន្ត្រីនានា រួមទាំងអភិបាលក្រុងញូវយ៉ក លោក Zohran Mamdani បានជំរុញកុំឱ្យប្រជាពលរដ្ឋធ្វើដំណើរតាមដងផ្លូវ ដើម្បីឱ្យក្រុមសង្គ្រោះបន្ទាន់អាចសម្អាតផ្លូវបាន ហើយសាលារៀននៅទីក្រុងញូវយ៉ក និងទូទាំងតំបន់ ត្រូវបានបិទដំណើរការ ដោយបន្ថែមថា ទីក្រុងញូវយ៉ក នៅតែស្ថិតក្នុងស្ថានភាពអាសន្ន។

អ្នកឧតុនិយមមកពីសេវាអាកាសធាតុជាតិអាមេរិក បាននិយាយថា ព្រិលធ្លាក់កម្រាស់ជិតកន្លះម៉ែត្រ គ្របដណ្ដប់ពាសពេញឧទ្យាន Central Park នៃទីក្រុងញូវយ៉ក និងកម្រាស់ជាង ៣៥ សង់ទីម៉ែត្រនៅទីក្រុងបូស្តុន។ គេហទំព័រតាមដានការដាច់ចរន្តអគ្គិសនីរបស់អាមេរិក បាននិយាយថា ផ្ទះសម្បែង និងអាជីវកម្មជាង ៦សែនកន្លែង នៅទូទាំងសហរដ្ឋអាមេរិក ពុំមានអគ្គិសនីប្រើប្រាស់នោះទេ គិតត្រឹមរសៀលថ្ងៃចន្ទ (ពេលវេលានៅអាមេរិក)។

នៅថ្ងៃចន្ទដដែលនោះ មានរដ្ឋយ៉ាងតិចចំនួន ៧រដ្ឋ បានប្រកាសគ្រាអាសន្ន ដោយសារតែព្យុះដ៏ខ្លាំងក្លានេះ។ យោងតាមគេហទំព័រតាមដានជើងហោះហើរ FlightAware បានឱ្យដឹងថា ក្រុមហ៊ុនអាកាសចរណ៍បានលុបចោលជើងហោះហើរជាង ៧.៤០០ ជើង គិតត្រឹមរសៀលថ្ងៃចន្ទ និងបានពន្យារពេលជើងហោះហើរចំនួន ២.៣០០ ជើងទៀត ខណៈតួលេខនោះ រួមបញ្ចូលទាំងជើងហោះហើរជាង ១.៨០០ ជើងដែលត្រូវបានលុបចោលសម្រាប់ថ្ងៃអង្គារ ទី២៤ ខែកុម្ភៈ នេះ៕