និស្សិតអ៊ីរ៉ង់ បានផ្គើននឹងការព្រមានរបស់អាជ្ញាធរ ដោយបន្តការតវ៉ារយៈពេលថ្ងៃបីជាប់ៗគ្នា គិតត្រឹមថ្ងៃចន្ទ (២៣ កុម្ភៈ) កន្លងទៅ ប៉ុន្មានសប្តាហ៍ប៉ុណ្ណោះបន្ទាប់ពីកងកម្លាំងសន្តិសុខអ៊ីរ៉ង់ បានបង្ក្រាបភាពចលាចលដ៏ធំ ដែលក្នុងនោះ មនុស្សរាប់ពាន់នាក់ត្រូវបានសម្លាប់ និងស្របពេលដែលសហរដ្ឋអាមេរិក កំពុងថ្លឹងថ្លែងពីលទ្ធភាពនៃការវាយប្រហារតាមអាកាស ប្រឆាំងនឹងសាធារណរដ្ឋអ៊ិស្លាមមួយនេះ។

ប្រព័ន្ធផ្សព្វផ្សាយរដ្ឋនានារបស់អ៊ីរ៉ង់ បានរាយការណ៍ថា និស្សិតនាំគ្នាចេញធ្វើបាតុកម្ម និងស្រែកឃ្លាតវ៉ា ប្រឆាំងរដ្ឋាភិបាលអ៊ីរ៉ង់ នៅសាកលវិទ្យាល័យតេអេរ៉ង់ និងមានសកម្មភាពដុតទង់ជាតិនៅសាកលវិទ្យាល័យ Al-Zahra ដែលជាសាកលវិទ្យាល័យសម្រាប់តែស្ត្រី ខណៈការប៉ះទង្គិចគ្នាបានកើតឡើងនៅសាកលវិទ្យាល័យ Amir Kabir ដែលមានទីតាំងនៅក្នុងរដ្ឋធានីតេអេរ៉ង់ផងដែរ។

នៅក្នុងសញ្ញាថ្មីមួយនៃភាពតានតឹងកាន់តែខ្លាំងឡើងនៅមជ្ឈិមបូព៌ា មន្ត្រីជាន់ខ្ពស់មួយរូបនៃក្រសួងការបរទេសអាមេរិកបាននិយាយថា សហរដ្ឋអាមេរិក បានចាប់ផ្តើមដកបុគ្គលិកដែលមិនចាំបាច់ និងសមាជិកគ្រួសាររបស់បុគ្គលិកទាំងនោះ ចេញពីស្ថានទូតនៅទីក្រុងបេរូត ប្រទេសលីបង់។

លោកប្រធានាធិបតីអាមេរិក Donald Trump បានគំរាមកំហែងអ៊ីរ៉ង់ ម្តងហើយម្តងទៀត ចាប់តាំងពីមានការតវ៉ាដ៏ធំទូទាំងប្រទេសអ៊ីរ៉ង់ កាលពីខែមករា កន្លងទៅ។ លោក Trump បានព្រមានកាលពីថ្ងៃព្រហស្បតិ៍សប្ដាហ៍មុនថា «រឿងអាក្រក់ៗនឹងកើតឡើង» ប្រសិនបើកិច្ចចរចានុយក្លេអ៊េររវាងប្រទេសទាំងពីរបរាជ័យ ហើយនៅថ្ងៃចន្ទសប្ដាហ៍នេះ លោកក៏បានព្រមានជាថ្មីម្ដងទៀតពី «ថ្ងៃអាក្រក់ដ៏អកុសល» សម្រាប់អ៊ីរ៉ង់ទាំងមូល ប្រសិនបើរបបនេះមិនចុះកិច្ចព្រមព្រៀងនុយក្លេអ៊ែរទេនោះ៕