បំណាក់ដី និងទឹកជំនន់ បានវាយប្រហារតំបន់ Ica និងតំបន់ Arequipa របស់ប្រទេសប៉េរូ ដោយបានបិទផ្លូវហាយវ៉េ យានយន្តត្រូវជាប់គាំង ហើយសហគមន៍នានាត្រូវស្ថិតនៅឯកោ ខណៈភ្លៀងធ្លាក់ខ្លាំងនៅតែបន្តនៅទូទាំងប្រទេសកាលពីថ្ងៃចន្ទ ទី២៣ ខែកុម្ភៈ។

វីដេអូបានបង្ហាញពីរថយន្តដឹកទំនិញមួយគ្រឿងបានក្រឡាប់ ហើយរថយន្តជាច្រើនទៀតកំពុងព្យាយាមធ្វើដំណើរតាមផ្លូវលិចទឹក ខណៈនគរបាលបានជួយអ្នកដំណើរជាប់គាំងខ្លួនឆ្លងកាត់ដោយថ្មើរជើង។

នៅតំបន់ Cayma និតំបន់ Arequipa រថយន្តមួយគ្រឿងទំនងជាត្រូវបានកប់បាត់ពាក់កណ្តាល នៅក្រោមដីល្បប់ ហើយលំនៅឋានច្រើនខ្នងបានរង្គើហៀបនឹងបាក់ស្រុត បន្ទាប់ពីទឹកជំនន់ដ៏គំហុកបានវាយបោកបក់ហូរនាំដី និងបំផ្លាញផ្លូវថ្នល់។

អាជ្ញាធរតំបន់ បានស្នើសុំឱ្យរដ្ឋាភិបាលជាតិប្រកាសរដ្ឋក្នុងគ្រាអាសន្ន និងបញ្ជូនគ្រឿងចក្រធុនធ្ងន់ពីក្រសួងដឹកជញ្ជូន កសិកម្ម និងលំនៅឋាន ដើម្បីពន្លឿនកិច្ចខិតខំប្រឹងប្រែងស្តារឡើងវិញ។

យោងតាមគណៈរដ្ឋមន្ត្រីរបស់ប្រទេសប៉េរូបានឲ្យដឹងថា ស្រុកជាង៧០០ នៅទូទាំងប្រទេសត្រូវបានប្រកាសក្នុងស្ថានភាពគ្រាអាសន្ន ដែលបង្ហាញស្ទើរតែពាក់កណ្តាលនៃស្រុកទាំងអស់។ ការព្យាករអាកាសធាតុនិយាយថាភ្លៀងធ្លាក់ពីមធ្យមទៅខ្លាំងនៅតែបន្តនៅទូទាំងតំបន់ឆ្នេរ និងតំបន់ភ្នំអង់ រហូតដល់ថ្ងៃទី ២៤ ខែកុម្ភៈនេះ។