សារព័ត៌មានទួរគី បានរាយការណ៍ដោយដកស្រង់ពីប្រព័ន្ធផ្សព្វផ្សាយអ៊ុយក្រែនថា លោក Kyrylo Budanov ប្រធានការិយាល័យប្រធានាធិបតីអ៊ុយក្រែន បាននិយាយកាលពីថ្ងៃចន្ទ (២៣ កុម្ភៈ) ថា កិច្ចចរចាជុំបន្ទាប់រវាងរុស្ស៊ី និងអ៊ុយក្រែន ក្នុងបំណងបញ្ចប់សង្រ្គាមដ៏បង្ហូរឈាម អាចនឹងធ្វើឡើងនៅថ្ងៃព្រហស្បតិ៍ ទី២៦ និងថ្ងៃសុក្រ ទី២៧ ខែកុម្ភៈ ក្នុងសប្ដាហ៍នេះ។

អ៊ុយក្រែន រុស្ស៊ី និងសហរដ្ឋអាមេរិក បានធ្វើកិច្ចចរចាជាច្រើនជុំមកហើយនៅទីក្រុងអាប៊ូដាប៊ី និងហ្សឺណែវ ខណៈទីក្រុងវ៉ាស៊ីនតោន ស្វះស្វែងបញ្ចប់សង្គ្រាមរយៈពេលបួនឆ្នាំ ចាប់តាំងពីប្រតិបត្តិការយោធារបស់ទីក្រុងមូស្គូ ក្នុងឆ្នាំ២០២២។ ថ្ងៃអង្គារ ទី២៤ ខែកុម្ភៈ ឆ្នាំ២០២៦ នេះគឺជាខួបគម្រប់ ៤ឆ្នាំពេញនៃសង្រ្គាមរុស្ស៊ី-អ៊ុយក្រែន។

យោងតាមទីភ្នាក់ងារសារព័ត៌មាន RBC-Ukraine លោក Budanov បាននិយាយថា កិច្ចចរចារវាងអ៊ុយក្រែន និងរុស្ស៊ី កំពុងខិតជិតដល់ចំណុចដែលភាគីនានានឹងត្រូវធ្វើការសម្រេចចិត្តចុងក្រោយថាតើ «បន្តសង្គ្រាមនេះ ឬឆ្ពោះទៅរកសន្តិភាព»។ នៅពេលត្រូវសាកសួរពីជុំបន្ទាប់នៃកិច្ចចរចា លោក Budanov បាននិយាយថា «លោកគិតថានៅចុងសប្តាហ៍នេះ» ប៉ុន្តែលោកមិនបានលម្អិតច្រើននោះទេ។

កាលពីសប្តាហ៍មុន ប្រធានាធិបតីអ៊ុយក្រែន លោក Volodymyr Zelenskyy បាននិយាយថា លោករំពឹងថា កិច្ចចរចាជុំថ្មីជាមួយរុស្ស៊ី ដែលជាជុំទី៤ នឹងធ្វើឡើងនៅមុនចុងខែកុម្ភៈនេះ ក្នុងប្រទេសស្វីស។ រុស្ស៊ី និងអ៊ុយក្រែន ក្រោមការសម្របសម្រួលរបស់អាមេរិក បានធ្វើកិច្ចចរចាសន្តិភាពជុំទីបី នៅទីក្រុងហ្សឺណែវ របស់ស្វីស នៅថ្ងៃទី១៧-១៨ ខែកុម្ភៈ បន្ទាប់ពីកិច្ចចរចាពីរជុំមុន នៅរដ្ឋធានីអាប៊ូដាប៊ី របស់អេមីរ៉ាតអារ៉ាប់រួម កាលពីដើមខែកុម្ភៈ និងក្នុងខែមករា ឆ្នាំ២០២៦ នេះ៕