ក្រុមមន្ត្រីបាននិយាយនៅថ្ងៃអង្គារ (២៤ កុម្ភៈ) នេះថា មនុស្សទាំង ៧នាក់ នៅលើយន្តហោះសង្គ្រោះបន្ទាន់ខ្នាតតូច Beechcraft ដែលបានធ្លាក់នៅរដ្ឋ Jharkhand ប្រទេសឥណ្ឌា កាលពីថ្ងៃចន្ទ បានស្លាប់ទាំងអស់ ដែលក្នុងនោះរួមមានបុគ្គលិក ២នាក់ អ្នកជំងឺដែលជាបុរសឈ្មោះ Sanjay Kumar និងសាច់ញាតិរបស់អ្នកជំងឺរូបនេះ។

អគ្គនាយកដ្ឋានអាកាសចរណ៍ស៊ីវិលឥណ្ឌា បាននិយាយកាលពីថ្ងៃចន្ទថា យន្តហោះ Beechcraft C90 ដែលដំណើរការដោយក្រុមហ៊ុន Redbird Airways បានហោះចេញពីក្រុង Ranchi ដែលជារដ្ឋធានីរបស់រដ្ឋ ប៉ុន្តែបានស្នើផ្លាស់ប្តូរផ្លូវហោះហើរដោយសារបញ្ហាអាកាសធាតុ ហើយក្រោយមក យន្តហោះនេះបានបាត់បង់ទំនាក់ទំនង និងការទាក់ទងជាមួយរ៉ាដា ជាបន្តបន្ទាប់។

លោក Keerthishree G អនុប្រធានស្រុក Chatra ជាទីដែលគ្រោះថ្នាក់បានកើតឡើង បាននិយាយថា «ក្រុមមន្រ្តីបានយកសាកសពចេញទាំងអស់ ហើយបញ្ជូនទៅធ្វើកោសល្យវិច័យ និងស៊ើបអង្កេតបន្ថែមទៀត»។ អគ្គនាយកដ្ឋានអាកាសចរណ៍ស៊ីវិល និយាយថា មន្រ្តីមួយក្រុមមកពីការិយាល័យស៊ើបអង្កេតគ្រោះថ្នាក់យន្តហោះរបស់ឥណ្ឌា ត្រូវបានបញ្ជូនទៅស៊ើបអង្កេតមូលហេតុ។

យោងតាមក្រុមអ្នកជំនាញក្នុងឧស្សាហកម្មនេះបនាឱ្យដឹងថា គ្រោះថ្នាក់ចរាចរណ៍ភាគច្រើន គឺបណ្តាលមកពីកត្តាផ្សេងៗជាច្រើន ហើយអាចចំណាយពេលយ៉ាងហោចណាស់ ១ឆ្នាំដើម្បីស៊ើបអង្កេត។

សាច់ញាតិរបស់អ្នកជំងឺរូបនោះ បានប្រាប់អ្នកយកព័ត៌មានថា លោក Sanjay Kumar បានរងរបួសក្នុងអគ្គិភ័យ ហើយដំបូងឡើយកំពុងទទួលការព្យាបាលនៅក្រុង Ranchi ប៉ុន្តែស្ថានភាពកាន់តែអាក្រក់ទៅៗ ទើបត្រូវនាំលោកទៅកាន់ទីក្រុងញូវដែលី ដោយប្រើយន្តហោះសង្គ្រោះបន្ទាន់នោះ៕