ក្រុមហ៊ុនដឹកជញ្ជូនសកល FedEx កាលពីថ្ងៃចន្ទ ទី២៣ ខែកុម្ភៈ បានដាក់ពាក្យបណ្តឹងនៅតុលាការពាណិជ្ជកម្មអន្តរជាតិសហរដ្ឋអាមេរិក ដោយស្វែងរកប្រាក់សំណងវិញសម្រាប់ការដំឡើងពន្ធគ្រាអសន្នរបស់លោកប្រធានាធិបតី Donald Trump ជាចំណាត់ការមួយក្នុងចំណោមចំណាត់ការធំៗដើម្បីទាមទារប្រាក់មកវិញចាប់តាំងពីតុលាការកំពូលសហរដ្ឋអាមេរិកកាលពីសប្តាហ៍មុន បានចាត់ទុកថាការដំឡើងពន្ធទាំងនេះ ខុសច្បាប់។

ការប្រមូលពន្ធរបស់សហរដ្ឋអាមេរិកបានជាង១៧៥ពាន់លានដុល្លារ អាចនឹងត្រូវសងសំណងវិញបន្ទាប់ពីតុលាការកំពូលសហរដ្ឋអាមេរិកកាលពីថ្ងៃសុក្រ ទី២០ ខែកុម្ភៈ បានចេញសេចក្តីសម្រេចសំឡេង ៦ទល់នឹង៣ ថាលោក Trump បានអនុវត្តហួសពីអំណាចរបស់លោកដោយប្រើប្រាស់ច្បាប់អំណាចសេដ្ឋកិច្ចគ្រាអាសន្នអន្តរជាតិ (IEEPA) ជាច្បាប់ទណ្ឌកម្មដើម្បីដាក់ការដំឡើងពន្ធលើទំនិញនាំចូល។

ក្រុមហ៊ុន FedEx និងសាខាក្រុមហ៊ុនដឹកជញ្ជូនរបស់ខ្លួន បានបម្រើការជាក្រុមហ៊ុននាំចូលច្រើនលើទំនិញដែលស្ថិតនៅក្រោមការដំឡើងពន្ធច្បាប់អំណាចសេដ្ឋកិច្ចគ្រាអាសន្នអន្តរជាតិ(IEEPA)។ ក្រុមហ៊ុនដែលមានមូលដ្ឋាននៅទីក្រុង Memphis រដ្ឋTennessee មិនបានផ្តល់តម្លៃជាប្រាក់ដុល្លារនៃសំណងដែលខ្លួនកំពុងទាមទារនោះទេ។ នៅក្នុងបណ្តឹងរបស់ខ្លួន ក្រុមហ៊ុន FedEx បានសរសេឈ្មោះអង្គភាពគយនិងការពារព្រំដែនសហរដ្ឋអាមេរិក ស្នងការរបស់ទីភ្នាក់ងារនេះលោក Rodney Scott និងសហរដ្ឋអាមេរិក ជាចុងចោទ។ ទីភ្នាក់ងារគយនិងការពារព្រំដែនសហរដ្ឋអាមេរិក(CBP) និងសេតវិមាន មិនបានឆ្លើយតបភ្លាមៗចំពោះសំណើសុំការអត្ថាធិប្បាយនៅឡើយទេ។