ប្រទេសអេក្វាឌ័រកាលពីសុក្រ បានដាក់ពង្រាយទាហាន ១០.០០០ នាក់ នៅក្នុងខេត្តឆ្នេរសមុទ្រចំនួនបី ដើម្បីប្រយុទ្ធប្រឆាំងនឹងក្រុមជួញដូរគ្រឿងញៀនដែលត្រូវបានស្តីបន្ទោសចំពោះការកើនឡើងនៃអំពើហិង្សា នៅក្នុងប្រទេសដែលធ្លាប់មានសន្តិភាពនេះ។

រដ្ឋាភិបាលរបស់លោកប្រធានាធិបតី Daniel Noboa បានប្តេថា នឹងប្រើវិធីសាស្រ្តកណ្តាប់ដៃដែក ខណៈដែលប្រទេសអាមេរិកខាងត្បូងនេះ ឈានដល់កម្រិតកំណត់ត្រានៃឃាតកម្ម និងឧក្រិដ្ឋកម្មហិង្សាផ្សេង   ទៀត។

លោកឧត្តមសេនីយ៍កងទ័ពអាកាស Mario Bedoya បានប្រាប់អ្នកយកព័ត៌មានថា ទាហានកងកម្លាំងពិសេសរាប់រយនាក់ ត្រូវបានដាក់ពង្រាយ កាលពីថ្ងៃសុក្រ ដើម្បីពង្រឹងប្រតិបត្តិការសន្តិសុខ» នៅក្នុងខេត្ត Guayas, Manabi និង Los Rios។ 

យន្តហោះដែលមានបុគ្គលិកយោធា ក៏ត្រូវបានបញ្ជូនទៅកំពង់ផែ Manta ដែលជាកំពង់ផែនេសាទសំខាន់របស់ប្រទេសនេះផងដែរ។

អេក្វាឌ័រមានទីតាំងស្ថិតនៅចន្លោះប្រទេសនាំចេញកូកាអ៊ីនឈានមុខគេពីររបស់ពិភពលោក គឺកូឡុំប៊ី និងប៉េរូ ហើយបានឃើញការកើនឡើងនៃអំពើហិង្សាបង្កឡើងដោយក្រុមជនអន្ធពាលដែលមានទំនាក់ទំនងជាមួយក្រុមជួញដូរគ្រឿងញៀនម៉ិកស៊ិក និងកូឡុំប៊ី៕