ទីបញ្ជាការការពារដែនអាកាសអាមេរិកខាងជើង (NORAD) និងទីបញ្ជាការភាគខាងជើងរបស់សហរដ្ឋអាមេរិក (USNORTHCOM) បានប្រកាសធ្វើសមយុទ្ធមួយដែលនាំកងកម្លាំងមកពីកាណាដា និងដាណឺម៉ាក ទៅកាន់រដ្ឋអាឡាស្កា និងកោះហ្គ្រីនលែន រហូតដល់ពាក់កណ្តាលខែមីនា។

ទីបញ្ជាការភាគខាងជើងរបស់សហរដ្ឋអាមេរិក បាននិយាយនៅក្នុងសេចក្តីប្រកាសព័ត៌មាននៅលើគេហទំព័ររបស់ខ្លួនថា៖«ទីបញ្ជាការការពារដែនអាកាសអាមេរិកខាងជើង (NORAD) និងទីបញ្ជាការភាគខាងជើងរបស់សហរដ្ឋអាមេរិក (USNORTHCOM) នឹងធ្វើសមយុទ្ធ ARCTIC EDGE 2026 (AE26) ដែលជាសមយុទ្ធហ្វឹកហ្វឺនទ្រង់ទ្រាយធំរួមគ្នា នៅទីតាំងផ្សេងៗគ្នាទូទាំងរដ្ឋអាឡាស្កា និងកោះហ្គ្រីនលែន ចាប់ពីថ្ងៃទី ២៣ ខែកុម្ភៈ ដល់ថ្ងៃទី ១៣ ខែមីនា ឆ្នាំ ២០២៦ ។ យោងតាមសេចក្តីប្រកាសព័ត៌មាន សមយុទ្ធ ARCTIC EDGE 2026 នេះ មានការចូលរួមពីប្រទេសដាណឺម៉ាក កាណាដា ឆ្មាំជាតិអាឡាស្កា និងដៃគូអន្តរទីភ្នាក់ងារ» រួមទាំង FBI និងឆ្មាំឆ្នេរសមុទ្រអាមេរិក ក្នុងចំណោមភ្នាក់ងារផ្សេងទៀត។

សេចក្តីប្រកាសព័ត៌មាននោះ បានឲ្យដឹងថា សមយុទ្ធនេះ ត្រូវបានរៀបចំឡើង «ដើម្បីបង្កើនការត្រៀមខ្លួន បង្ហាញសមត្ថភាព និងបង្កើនអន្តរប្រតិបត្តិការ» ក្នុងចំណោមដៃគូអាមេរិកនៅតំបន់អាកទិក។ គោលបំណងសំខាន់ៗនៃសមយុទ្ធនេះ រួមមានការការពារពីការវាយប្រហារដោយមីស៊ីលតម្រង់គោលដៅ ការទប់ទល់នឹងប្រព័ន្ធយានដ្រូន និងការហ្វឹកហ្វឺនទាក់ទងនឹងដំណើរការរស់រានមានជីវិត និងការចល័តនៅតំបន់អាកទិក៕