ប្រភពព័ត៌មានពីរ បានប្រាប់សារព័ត៌មានរ៉យទ័រថា ប្រទេសឆាដ បានបិទព្រំដែនភាគខាងកើតរបស់ខ្លួនជាមួយស៊ូដង់ កាលពីថ្ងៃចន្ទ បន្ទាប់ពីការប៉ះទង្គិចគ្នានៅចុងសប្តាហ៍ដែលទាក់ទងនឹងសង្គ្រាមស៊ីវិលនៅស៊ូដង់ បានសម្លាប់ទាហានឆាដចំនួន ៥នាក់។ 

ជម្លោះនៅស៊ូដង់រវាងកងទ័ពស៊ូដង់ និងកងកម្លាំងគាំទ្ររហ័ស (RSF) ដែលបានផ្ទុះឡើងក្នុងខែមេសា ឆ្នាំ២០២៣ បានរីករាលដាលដល់ទឹកដីឆាដជាប្រចាំ ដែលបានបណ្តាលឲ្យាមានអ្នកស្លាប់ និងខូចខាតទ្រព្យសម្បត្តិ។

មន្ត្រីឆាដម្នាក់បានប្រាប់កាសែតរ៉យទ័រថា ការប៉ះទង្គិចគ្នាកាលពីថ្ងៃសៅរ៍រវាង RSF និងយុទ្ធជនកងជីវពលដែលស្មោះត្រង់នឹងរដ្ឋាភិបាលស៊ូដង់ នៅក្នុងទីក្រុងព្រំដែន Tine បានសម្លាប់ទាហាន ៥នាក់ និងជនស៊ីវិលបីនាក់ និង មនុស្ស ១២នាក់ផ្សេងទៀត រងរបួស។

មន្ត្រីឆ្មាំព្រំដែនម្នាក់នៅទីក្រុង Tine បានបញ្ជាក់ពីការស្លាប់របស់ទាហានទាំង ៥នាក់ និងបាននិយាយថា វិធានការសន្តិសុខបន្ថែម គឺត្រូវការ ដើម្បីការពារជនស៊ីវិលនៅខាងឆាដ។

ប្រភពទាំងពីរ ដែលបាននិយាយក្នុងលក្ខខណ្ឌមិនបញ្ចេញឈ្មោះ ដោយសារតែពួកគេមិនត្រូវបានអនុញ្ញាតឲ្យនិយាយទៅកាន់ប្រព័ន្ធផ្សព្វផ្សាយ បានអះអាងថា កងទ័ពឆាដបន្ថែមទៀត កំពុងត្រូវបានដាក់ពង្រាយ ទៅកាន់តំបន់នោះ៕