ដោយដកស្រង់ពីទីភ្នាក់សន្តិសុខសហព័ន្ធ (FSB) សារព័ត៌មានគ្រប់គ្រងដោយរដ្ឋ Rossiyskaya Gazeta បានរាយការណ៍ថា ប្រទេសរុស្ស៊ីកំពុងស៊ើបអង្កេតស្ថាបនិករបស់កម្មវិធីផ្ញើសារ Telegram គឺលោក Pavel Durov ដែលជាផ្នែកនៃសំណុំរឿងព្រហ្មទណ្ឌ ពាក់ព័ន្ធនឹង «ការសម្របសម្រួលសកម្មភាពភេរវកម្ម»។

លោក Durov មិនអាចទាក់ទងបានភ្លាមៗឡើយ ដើម្បីសុំការអត្ថាធិប្បាយ អំពីសេចក្ដីរាយការណ៍នេះ ប៉ុន្តែនៅប៉ុន្មានថ្ងៃថ្មីៗនេះ Telegram បានបដិសេធការចោទប្រកាន់ជាច្រើនពីរុស្ស៊ី ដែលថា កម្មវិធីនេះ គឺជាជម្រកសុវត្ថិភាព សម្រាប់សកម្មភាពឧក្រិដ្ឋកម្ម និងត្រូវបានសម្របសម្រួលដោយចារកម្មលោកខាងលិច និងអ៊ុយក្រែន។

នៅក្នុងអត្ថបទមួយ ដែលខ្លួនបានប្រាប់ថា «ផ្អែកលើប្រភពពី FSB របស់ប្រទេសរុស្ស៊ី» សារព័ត៌មាន Rossiyskaya Gazeta បានរាយការណ៍ថា៖ «សកម្មភាពរបស់ប្រធានកម្មវិធីផ្ញើសារ Telegram លោក P. Durov កំពុងត្រូវបានស៊ើបអង្កេត ដែលជាផ្នែកនៃសំណុំរឿងព្រហ្មទណ្ឌដោយជាប់សង្ស័យបទល្មើសព្រហ្មទណ្ឌ ក្រោមកថាខណ្ឌទី ១.១ នៃមាត្រាទី ២០៥.១ (ការផ្ដល់ជំនួយដល់សកម្មភាពភេរវកម្ម) នៃក្រមព្រហ្មទណ្ឌរបស់ប្រទេសរុស្ស៊ី"។

Telegram ដែលប្រាប់ថា ខ្លួនមានអ្នកប្រើប្រាស់សកម្មជាង ១ពាន់លាននាក់នៅទូទាំងពិភពលោក មិនបានឆ្លើយតបភ្លាមៗឡើយ ចំពោះសំណើរបស់សារព័ត៌មាន Reuters ដើម្បីសុំការធ្វើអត្ថាធិប្បាយ៕