នៅថ្ងៃអង្គារ (ទី២៤ ខែកុម្ភៈ ឆ្នាំ២០២៦) នេះ ប្រមុខមហាសន្និបាតអង្គការសហប្រជាជាតិ (UNGA) បានជំរុញឲ្យអ្នករួមវិភាគទានធំជាងគេ គឺសហរដ្ឋអាមេរិក ទូទាត់ទឹកប្រាក់ទាំងស្រុង បន្ទាប់ពីទីក្រុងវ៉ាស៊ីនតោនបានបង់តែមួយផ្នែកទៅឲ្យស្ថាប័នពិភពលោកមួយនេះ ដែលមានចំនួនតិចជាង ៥ភាគរយនៃចំនួនសរុបដែលបានជំពាក់។

សហរដ្ឋអាមេរិកបានបង់ប្រាក់ប្រហែល ១៦០លានដុល្លារ ក្នុងចំណោមចំនួនជាង ៤ពាន់លានដុល្លារដែលខ្លួន ជំពាក់អង្គការសហប្រជាជាតិ (UN)។ នេះបើយោងតាមអ្នកនាំពាក្យរបស់ UN បាននិយាយឲ្យដឹងកាលពីសប្តាហ៍មុន បន្ទាប់ពីទីភ្នាក់ងារសារព័ត៌មាន Reuters បានរាយការណ៍ថា ការទូទាត់ដំបូង កំពុងជិតកើតមាន។

អគ្គលេខាធិការ UN បានព្រមានថា ស្ថាប័ននេះប្រឈមមុខនឹង «ការដួលរលំផ្នែកហិរញ្ញវត្ថុយ៉ាងឆាប់រហ័ស» ដោយសារតែទឹកប្រាក់មិនទាន់បង់។

នៅពេលត្រូវបានសួរ អំឡុងសន្និសីទសារព័ត៌មាននៅទីក្រុងហ្សឺណែវ ប្រទេសស្វីស អំពីការទូទាត់របស់សហរដ្ឋអាមេរិក ប្រមុខ UNGA លោកស្រី Annalena Baerbock បាននិយាយថា៖ «គ្រប់រដ្ឋជាសមាជិកត្រូវបង់វិភាគទានរបស់ខ្លួនឲ្យបានទាំងស្រុង និងទាន់ពេលវេលា ហើយទឹកប្រាក់ ១៦០លានដុល្លារ មិនពេញលេញនោះទេ»។

ប្រធានាធិបតីសហរដ្ឋអាមេរិក លោក Donald Trump កាលពីសប្តាហ៍មុន បានធ្វើជាម្ចាស់ផ្ទះនៃកិច្ចប្រជុំលើកដំបូងនៃគំនិតផ្តួចផ្តើមក្រុមប្រឹក្សាសន្តិភាព (Board of Peace) របស់លោក ដែលអ្នកជំនាញលើកឡើងថា អាចធ្វើឲ្យ UN ចុះខ្សោយ៕