វិមានក្រឹមឡាំង នៅថ្ងៃអង្គារ (ទី២៤ ខែកុម្ភៈ ឆ្នាំ២០២៦) នេះ បានលើកឡើងថា ការសម្រេចចិត្តរបស់ប្រទេសលោកខាងលិច ក្នុងការចូលជ្រៀតជ្រែកក្នុងជម្លោះ នៅអ៊ុយក្រែន មានន័យថា វាបានក្លាយជាការប្រឈមមុខដាក់គ្នាកាន់តែធំឡើងៗជាមួយបណ្ដាប្រទេស ដែលរុស្ស៊ីជឿថា ចង់ធ្វើឲ្យខ្លួនចុះខ្សោយ។

អំឡុងពេលថ្លែងក្នុងរយៈពេលជាក់ស្ដែងពេញ ៤ឆ្នាំបន្ទាប់ពីកងទ័ពរុស្ស៊ីរាប់ម៉ឺននាក់ បានចូលទៅក្នុងប្រទេសអ៊ុយក្រែនតាមបទបញ្ជារបស់ប្រធានាធិបតី លោក Vladimir Putin អ្នកនាំពាក្យវិមានក្រឹមឡាំង លោក Dmitry Peskov បាននិយាយថា ការប្រយុទ្ធគ្នានៅតែបន្តមាន ប៉ុន្តែទីក្រុងមូស្គូនៅតែបើកចំហ សម្រាប់ការសម្រេចគោលបំណងរបស់ខ្លួន តាមរយៈមធ្យោបាយនយោបាយ និងការទូត។

លោក Peskov បានលើកឡើងថា៖ «បន្ទាប់ពីមានការចូលជ្រៀតជ្រែកដោយផ្ទាល់នៅក្នុងជម្លោះនេះ ដោយបណ្ដាប្រទេសអឺរ៉ុបខាងលិច និងសហរដ្ឋអាមេរិក ប្រតិបត្តិការយោធាពិសេស បានប្រែក្លាយទៅជាការប្រឈមមុខដាក់គ្នាកាន់តែធំឡើងៗ រវាងរុស្ស៊ី និងប្រទេសលោកខាងលិច ដែលមាន និងបន្តបំពេញគោលដៅបំផ្លាញប្រទេសរបស់យើង»។

នៅពេលសួរត្រូវបានថា តើទីក្រុងមូស្គូជឿថា ជម្លោះនេះអាចត្រូវបានដោះស្រាយតាមរយៈការចរចាដែរឬទេ លោក Peskov បានឆ្លើយថា៖ «យើងកំពុងបន្តកិច្ចប្រឹងប្រែងរបស់យើង ដើម្បីសម្រេចបាននូវសន្តិភាព ហើយគោលជំហររបស់យើង គឺច្បាស់លាស់ និងមិនកែប្រែឡើយ។ ឥឡូវនេះអ្វីៗគ្រប់យ៉ាងអាស្រ័យលើសកម្មភាពរបស់របបទីក្រុងគីវ»៕