មន្ត្រីជាន់ខ្ពស់លីបង់ ២រូប បាននិយាយនៅថ្ងៃអង្គារ (ទី២៤ ខែកុម្ភៈ ឆ្នាំ២០២៦) នេះថា ប្រទេសអ៊ីស្រាអែលបានផ្ញើសារដោយប្រយោលថា ខ្លួននឹងវាយប្រហារលីបង់យ៉ាងខ្លាំងក្លា ដោយកំណត់គោលដៅហេដ្ឋារចនាសម្ព័ន្ធស៊ីវិល ក្នុងនោះរួមទាំងអាកាសយានដ្ឋាន ក្នុងករណីដែលក្រុមហេសបូឡាចូលរួមក្នុងសង្គ្រាមអាមេរិក-អ៊ីរ៉ង់។

ទាំងការិយាល័យរបស់លោកនាយករដ្ឋមន្ត្រីអ៊ីស្រាអែល Benjamin Netanyahu និងប្រធានាធិបតីលីបង់មិនបានឆ្លើយតបភ្លាមៗឡើយ ចំពោះសំណើសុំការអត្ថាធិប្បាយ ពាក់ព័ន្ធនឹងការលើកឡើងនេះ។

រដ្ឋមន្ត្រីការបរទេសអូម៉ង់ លោក Badr Albusaidi បាននិយាយកាលពីថ្ងៃអាទិត្យចុងសប្ដាហ៍កន្លងមកថា អ៊ីរ៉ង់ និងសហរដ្ឋអាមេរិក នឹងធ្វើកិច្ចចរចានុយក្លេអ៊ែរជុំទី៣ នៅថ្ងៃព្រហស្បតិ៍ ក្នុងទីក្រុងហ្សឺណែវ ប្រទេសស្វីស ស្របពេលមានក្ដីបារម្ភកាន់តែខ្លាំងឡើងៗ អំពីហានិភ័យនៃការផ្ទុះជម្លោះយោធា រវាងគូសត្រូវទាំង២។

អ៊ីស្រាអែល បានផ្ដល់ការប៉ះពាល់យ៉ាងធ្ងន់ធ្ងរទៅលើក្រុមប្រដាប់អាវុធហេសបូឡាដែលគាំទ្រដោយអ៊ីរ៉ង់ក្នុងអំឡុងសង្គ្រាម កាលពីឆ្នាំ២០២៤ ដោយបានសម្លាប់មេដឹកនាំ គឺលោក Hassan Nasrallah រួមជាមួយយុទ្ធជនរាប់ពាន់នាក់ និងបំផ្លាញឃ្លាំងអាវុធភាគច្រើនរបស់ក្រុមនេះ។

ក្រុមហេសបូឡា ដែលជាមូស្លីមនិកាយ Shia ត្រូវបានបង្កើតឡើងដោយកងឆ្មាំបដិវត្តន៍ឥស្លាមអ៊ីរ៉ង់ ក្នុងឆ្នាំ ១៩៨២។ លោក Naim Qassem មេដឹកនាំថ្មីរបស់ក្រុមហេសបូឡា បាននិយាយនៅក្នុងសុន្ទរកថាតាមទូរទស្សន៍កាលពីខែមុនថា ក្រុមនេះ «មិនឈរនៅកណ្ដាលឡើយ» ក្នុងអំឡុងពេលមានការប្រឈមមុខដាក់គ្នា រវាងទីក្រុងវ៉ាស៊ីនតោន និងតេអេរ៉ង់ ហើយថា ខ្លួន «គឺជាគោលដៅនៃការឈ្លានពានដែលអាចកើតមាននាពេលខាងមុខ»៕