ក្រុមយោធាប៉ារ៉ានៃកងកម្លាំងគាំទ្ររហ័ស(RSF) នៅប្រទេសស៊ូដង់ បានធ្វើការវាយឆ្មក់ទ្រង់ទ្រាយធំមួយនៅក្នុងរដ្ឋ North Darfur ដោយបានសម្លាប់និងធ្វើឱ្យរងរបួសមនុស្សរាប់សិបនាក់។ បណ្តាញគ្រូពេទ្យស៊ូដង់ ដែលតាមដានអំពើហិង្សាក្នុងសង្គ្រាមរយៈពេលបីឆ្នាំមកនេះ បាននិយាយថា កងកម្លាំងគាំទ្ររហ័ស(RSF) បានវាយលុកឆ្លងកាត់ទីក្រុង Misteriha ដោយសម្លាប់មនុស្សយ៉ាងហោចណាស់ ២៨ នាក់ និងធ្វើឱ្យមនុស្ស ៣៩ នាក់ផ្សេងទៀតរងរបួស រួមមានស្ត្រី ១០ នាក់។

ការវាយប្រហារនេះ បានបំផ្លាញមណ្ឌលសុខភាពដែលមានតែមួយគត់នៅក្នុងតំបន់នោះ។ បណ្តាញគ្រូពេទ្យបាននិយាយថា បុគ្គលិកពេទ្យស្ថិតក្នុងចំណោមអ្នកទាំងឡាយដែលត្រូវបានវាយប្រហារ។

ក្រុមនេះនិយាយថា «ការវាយប្រហារ បង្កើតបានជាឧក្រិដ្ឋកម្មពេញលេញ និងជាការរំលោភបំពានយ៉ាងច្បាស់លាស់លើច្បាប់មនុស្សធម៌និងច្បាប់អន្តរជាតិទាំងអស់ ដែលធ្វើឱ្យការវាយប្រហារលើជនស៊ីវិល ក្លាយជាបទឧក្រិដ្ឋ»។

ការវាយប្រហារលើទីក្រុង Misteriha បានកើតឡើងប្រឆាំងនឹងផ្ទៃខាងក្រោយនៃភាពតានតឹងកុលសម្ព័ន្ធដែលកើនឡើងនៅក្នុងតំបន់ភាគខាងលិចតំបន់ Darfur ជាកន្លែងដែលការស៊ើបអង្កេតរបស់អង្គការសហប្រជាជាតិកាលពីសប្តាហ៍មុនបានរកឃើញថា កងកម្លាំងគាំទ្ររហ័ស(RSF) បានប្រព្រឹត្តអំពើប្រល័យពូជសាសន៍ប្រឆាំងក្រុមជនជាតិភាគតិចដែលមិនមែនជាពលរដ្ឋអារ៉ាប់។

ក្រុមមេធាវីគ្រាអាសន្ន ជាក្រុមឯករាជ្យមួយដែលកត់ត្រាអំពើឃោរឃៅនៅស៊ូដង់ បាននិយាយថា ក្រុមអ្នកប្រយុទ្ធកងកម្លាំងគាំទ្ររហ័ស បានដុតផ្ទះជាច្រើនខ្នងនៅក្នុងទីក្រុង ដោយបង្ខំឱ្យប្រជាជនភៀសខ្លួនទៅកាន់ភូមិក្បែរៗនោះ។