កងកម្លាំងប្រទេសអាហ្វហ្គានីស្ថាន និងប៉ាគីស្ថាន បានប៉ះទង្គិចគ្នាជាថ្មីនៅតាមបណ្តោយតំបន់ព្រំដែនដែលមានជម្លោះរបស់ពួកគេ ប៉ុន្មានថ្ងៃបន្ទាប់ពីការវាយប្រហារតាមអាកាសដ៏បង្ហូរឈាមលើប្រទេសអាហ្វហ្គានីស្ថានធ្វើឡើងដោយប្រទេសប៉ាគីស្ថាន ដែលបានធ្វើឱ្យភាពតានតឹងកើនឡើង។ ប្រទេសទាំងពីរ បានផ្តល់របាយការណ៍ប្រឆាំងគ្នាអំពីអំពើហិង្សាកាលពីថ្ងៃអង្គារ ដោយភាគីទាំងសងខាងបានចោទប្រកាន់គ្នាទៅវិញទៅមកថាជាអ្នកបង្កឡើង។

លោក Zabihullah Noorani ប្រធាននាយកដ្ឋានព័ត៌មានរបស់អាហ្វហ្គានីស្ថាន នៅខេត្ត Nangarhar ភាគខាងកើត បាននិយាយថា កងកម្លាំងប៉ាគីស្ថាន បានបាញ់លើកដំបូងនៅក្នុងតំបន់ Shahkot ជិតព្រំដែន ហើយការប្រយុទ្ធគ្នាបានបញ្ឈប់ដោយពុំមានអ្នកស្លាប់និងរងរបួសជនជាតិអាហ្វហ្គានីស្ថានទេ។

ការប្រយុទ្ធគ្នា បានកើតឡើងបន្ទាប់ពីការវាយប្រហារពីខាងប៉ាគីស្ថាន លើខេត្ត Nangarhar និង Paktika របស់ប្រទេសអាហ្វហ្គានីស្ថានកាលពីថ្ងៃអាទិត្យ ដែលបេសកកម្មអង្គការសហប្រជាជាតិនៅអាហ្វហ្គានីស្ថាន បាននិយាយថា បានសម្លាប់ជនស៊ីវិលយ៉ាងហោចណាស់ ១៣ នាក់។

រដ្ឋាភិបាលតាលីបង់របស់ប្រទេសអាហ្វហ្គានីស្ថានបាននិយាយថា មនុស្សយ៉ាងហោចណាស់ ១៨ នាក់ត្រូវបានសម្លាប់ ហើយបានបដិសេធការប្រកាសរបស់ប៉ាគីស្ថានថា ប្រតិបត្តិការយោធាបានសម្លាប់អ្នកប្រយុទ្ធជាង៨០នាក់។

ទំនាក់ទំនងរវាងប្រទេសជិតខាងទាំងពីរបានធ្លាក់ចុះយ៉ាងខ្លាំងក្នុងរយៈពេលប៉ុន្មានខែថ្មីៗនេះ ដោយច្រកព្រំដែនគោកភាគច្រើនត្រូវបានបិទចាប់តាំងពីការប្រយុទ្ធគ្នាដ៏បង្ហូរឈាមកាលពីខែតុលា ដែលបានសម្លាប់មនុស្សជាង ៧០ នាក់នៅភាគីទាំងសងខាង។