រុស្ស៊ី បានចោទប្រកាន់អ៊ុយក្រែន កាលពីថ្ងៃអង្គារ (២៤ កុម្ភៈ) ថា កំពុងតែព្យាយាមទទួលបានអាវុធនុយក្លេអ៊ែរដោយមានជំនួយពីចក្រភពអង់គ្លេស និងបារាំង ជាអ្វីដែលទីក្រុងគីវ បានច្រានចោលថាជា «ការភូតកុហកដ៏ផ្ដេសផ្ដាសមិនសមហេតុផល»។

លោក Heorhii Tykhyi អ្នកនាំពាក្យក្រសួងការបរទេសអ៊ុយក្រែន បានប្រាប់សារព័ត៌មានរ៉យទ័រថា៖ ក្រុមមន្ត្រីរុស្ស៊ី ដែលល្បីល្បាញដោយសារកំណត់ត្រាភូតភរដ៏គួរឱ្យចាប់អារម្មណ៍របស់ពួកគេ កំពុងតែព្យាយាមបង្កើតរឿងផ្ដេសផ្ដាស «ដ៏កខ្វក់» ដដែលៗម្តងទៀត។ អ្នកនាំពាក្យរូបនេះបញ្ជាក់ថា៖ «អ៊ុយក្រែនបានបដិសេធការអះអាងមិនសមហេតុផលបែបនេះរបស់រុស្ស៊ី ច្រើនដងមកហើយពីមុនមក ហើយឥឡូវនេះ អ៊ុយក្រែនសូមបដិសេធជាផ្លូវការម្តងទៀត។ អ៊ុយក្រែនសូមជំរុញឱ្យសហគមន៍អន្តរជាតិរួមគ្នាបដិសេធ និងថ្កោលទោសគ្រាប់បែកព័ត៌មានដ៏កខ្វក់របស់រុស្ស៊ី»។

នៅមុននោះ ចារកម្មសម្ងាត់បរទេស (SVR) របស់រុស្ស៊ី ចោទប្រកាន់ដោយមិនផ្តល់ភស្តុតាងថា អង់គ្លេស និងបារាំង កំពុងរៀបចំផ្គត់ផ្គង់ធាតុផ្សំ និងបច្ចេកវិទ្យាអាវុធនុយក្លេអ៊ែរឱ្យអ៊ុយក្រែន ដោយសម្ងាត់។ 

អ្នកនាំពាក្យក្រសួងការបរទេសបារាំងនិយាយថា ការចោទប្រកាន់នេះគឺជា «ការបំភ្លៃព័ត៌មានយ៉ាងច្បាស់ក្រឡែត»។ អ្នកនាំពាក្យរបស់លោកនាយករដ្ឋមន្ត្រីអង់គ្លេស Keir Starmer បាននិយាយថា «ពុំមានការពិតទាល់តែសោះចំពោះរឿងនេះ»។ កាលពីមុន លោកប្រធានាធិបតីអ៊ុយក្រែន លោក Volodymyr Zelenskyy បានរិះគន់ការសម្រេចចិត្តរបស់ទីក្រុងគីវ ក្នុងការបោះបង់ចោលឃ្លាំងអាវុធនុយក្លេអ៊ែរអតីតសម័យសូវៀតរបស់ខ្លួន ក្នុងទសវត្សរ៍ឆ្នាំ១៩៩០ ដោយមិនទទួលបានការធានាសន្តិសុខត្រឹមត្រូវ និងជាប់ចំណងផ្លូវច្បាប់។ ទោះយ៉ាងនេះក្ដី អ៊ុយក្រែនតែងនិយាយថា ខ្លួនមិនស្វះស្វែងបង្កើតអាវុធនុយក្លេអ៊ែរឡើងវិញទេ ហើយគោរពសន្ធិសញ្ញាអន្តរជាតិទាំងអស់៕