អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយតឺរេស ( Antonio Guterres) បាននិយាយថា រយៈពេល ៤ឆ្នាំ បន្ទាប់ពីការឈ្លានពានទ្រង់ទ្រាយធំរបស់រុស្ស៊ីលើអ៊ុយក្រែន សង្គ្រាមនៅទីនោះ នៅតែ «ជាសកម្មភាពជាប្រព័ន្ធដ៏អាម៉ាសបំផុត» ហើយបានបញ្ជាក់ជាថ្មីនូវការអំពាវនាវឲ្យមានបទឈប់បាញ់ជាបន្ទាន់។

នៅក្នុងសុន្ទរកថាសម្រាប់សម័យប្រជុំក្រុមប្រឹក្សាសន្តិសុខអង្គការសហប្រជាជាតិ ដើម្បីប្រារព្ធខួបលើកទី៤នៃការឈ្លានពានរបស់រុស្ស៊ី លោក ហ្គុយតឺរេស បានសរសើរកិច្ចខិតខំប្រឹងប្រែងរបស់សហរដ្ឋអាមេរិក និងប្រទេសដទៃទៀត ដើម្បីបញ្ចប់សង្គ្រាមនេះ ប៉ុន្តែបាននិយាយថា វិធានការជាក់ស្តែង គឺត្រូវការជាចាំបាច់ ដើម្បី «បន្ថយភាពតានតឹង និងបង្កើតឱកាសសម្រាប់ការទូត»។

ដោយសំដៅទៅលើការឈ្លានពានរបស់រុស្ស៊ី លោក ហ្គុយតឺរេស បាននិយាយថា៖«យើងបានឃើញផលវិបាកជាបន្តបន្ទាប់នៃការរំលោភបំពានច្បាប់អន្តរជាតិយ៉ាងច្បាស់លាស់នេះ»។

លោកបានបញ្ជាក់ថា ជនស៊ីវិលជាង ១៥.០០០ នាក់ ត្រូវបានសម្លាប់ នៅក្នុងប្រទេសអ៊ុយក្រែន ចាប់តាំងពីការចាប់ផ្តើមនៃសង្គ្រាមនេះ ហើយជាង ៤១.០០០នាក់ បានរងរបួស។ ក្នុងចំណោមអ្នកដែលត្រូវបានសម្លាប់ ឬរងរបួស មានកុមារ ៣.២០០នាក់។

សុន្ទរកថារបស់លោក ហ្គុយតឺរេស ត្រូវបានអានក្នុងនាមលោក ដោយលោកស្រី Rosemary DiCarlo អគ្គលេខាធិការរងអង្គការសហប្រជាជាតិទទួលបន្ទុកការកសាងសន្តិភាព។

លោក ហ្គុយតឺរេស បានព្រមានថា ការប្រយុទ្ធគ្នាបានបង្កហានិភ័យដោយផ្ទាល់ដល់ប្រតិបត្តិការប្រកបដោយសុវត្ថិភាព និងសន្តិសុខនៃទីតាំងនុយក្លេអ៊ែររបស់អ៊ុយក្រែន ហើយបានបន្ថែមថា៖«ការវាយប្រហារដោយនុយក្លេអ៊ែរដ៏មិនសមហេតុផលនេះ ត្រូវតែបញ្ឈប់ជាបន្ទាន់»៕