ក្រសួងមហាផ្ទៃចក្រភពអង់គ្លេស បាននិយាយថា ចាប់ពីថ្ងៃពុធ ទី២៥ ខែកុម្ភៈ នេះតទៅ អ្នកទេសចរមកពី ៨៥ ប្រទេស ដែលចូលទៅកាន់ចក្រភពអង់គ្លេស ត្រូវតែមានលិខិតអនុញ្ញាតអេឡិចត្រូនិកជាមុនសិន មុននឹងធ្វើដំណើរ បើមិនដូច្នោះទេ ពួកគេនឹងត្រូវហាមឃាត់មិនឱ្យធ្វើដំណើរទៅប្រទេសនេះឡើយ។

គម្រោងអនុញ្ញាតធ្វើដំណើរតាមប្រព័ន្ធអេឡិចត្រូនិក (ឬហៅថាបណ្ណអនុញ្ញាត ETA) តម្រូវឱ្យអ្នកទៅទស្សនាទាំងអស់ ដែលមិនត្រូវការទិដ្ឋាការដើម្បីចូលចក្រភពអង់គ្លេស ត្រូវតែទិញលិខិតអនុញ្ញាតនេះតាមអ៊ីនធឺណិត មុនពេលធ្វើដំណើរ នៅក្នុងតម្លៃ ១៦ផោន (២១,៥៧ ដុល្លារអាមេរិក)។ សេចក្ដីតម្រូវនេះត្រូវបានដាក់ចេញនៅឆ្នាំ២០២៣ ហើយបានពង្រីកដល់ភ្ញៀវទេសចរអឺរ៉ុប នៅក្នុងខែមេសា ឆ្នាំមុន ប៉ុន្តែមិនត្រូវបានអនុវត្តយ៉ាងតឹងរ៉ឹងនោះទេ។

យ៉ាងណាមិញ ចាប់ពីថ្ងៃទី២៥ ខែកុម្ភៈ នេះតទៅ អ្នកទេសចរដែលទៅទស្សនាចក្រភពអង់គ្លេស នឹងត្រូវតែមានបណ្ណ ETA ដើម្បីធ្វើដំណើរ។ ក្រសួងមហាផ្ទៃអង់គ្លេស បាននិយាយថា នេះមានន័យថា ក្រុមហ៊ុនអាកាសចរណ៍នឹងរារាំងអ្នកដំណើរមិនឱ្យឡើងយន្តហោះនោះទេ ប្រសិនបើពួកគេមិនមានបណ្ណ ETA ឬទិដ្ឋាការអេឡិចត្រូនិក (eVisa) ឬឯកសារដែលមានសុពលភាពផ្សេងទៀត។

ក្រសួងបញ្ជាក់ថា សម្រាប់ពលរដ្ឋអង់គ្លេស និងអៀរឡង់ រួមទាំងពលរដ្ឋមានសញ្ជាតិទាំងពីរនេះ ក៏ដូចជាអ្នកដែលមានសិទ្ធិរស់នៅក្នុងចក្រភពអង់គ្លេស ត្រូវបានលើកលែង ដោយមិនត្រូវការបណ្ណ ETA ដើម្បីចូលចក្រភពអង់គ្លេសនោះឡើយ៕