ភ្នំពេញ៖ នៅថ្ងៃទី២៥ ខែកុម្ភៈ ឆ្នាំ២០២៦ ឯកឧត្ដមបណ្ឌិត ចាយ បូរិន រដ្ឋមន្រ្តីក្រសួងធម្មការ និងសាសនា បានអញ្ជើញជាអធិបតីក្នុងពិធីបើកសន្និបាតបូកសរុបលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦ មានរយៈពេល២ថ្ងៃគឺចាប់ពីថ្ងៃទី២៥ ដល់ទី២៦ ខែកុម្ភៈ ឆ្នាំ២០២៦។​

ថ្លែងក្នុងពិធីនេះ ឯកឧត្ដមរដ្ឋមន្ត្រីបានកោតសរសើរ និងវាយតម្លៃខ្ពស់ចំពោះថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់នៃក្រសួងធម្មការ និងសាសនា ដែលបានខិតខំបំពេញភារកិច្ចការងារយ៉ាងសកម្ម ក្នុងស្មារតីទទួលខុសត្រូវខ្ពស់ ព្រមទាំងសម្រេចបាននូវសមិទ្ធផលសំខាន់ៗគួរជាទីមោទនៈជូនក្រសួង និងរាជរដ្ឋាភិបាលក្នុងឆ្នាំកន្លងទៅនេះ។

ឯកឧត្ដមបន្ថែមថា នៅក្នុងនីតិកាលទី៧ នៃរដ្ឋសភានេះក្រសួងធម្មការ និងសាសនាក្នុងនាមជាសេនាធិការរបស់រាជរដ្ឋាភិបាលបានបន្តអនុវត្តគោលនយោបាយ«លើកកម្ពស់សាសនារបស់រដ្ឋ តម្លៃសីលធម៌សង្គម និងសុខដុមនីយកម្មសាសនា»នៅកម្ពុជា ដើម្បីបន្តពង្រឹងភាពជាពលរដ្ឋល្អក្នុងសង្គម ដែលមានអារ្យធម៌ខ្ពស់ ប្រកបដោយសីលធម៌ សមធម៌ និងបរិយាបន្ន។

ឯកឧត្តមរដ្ឋមន្រ្តីបញ្ជាក់បន្ថែមថា ដើម្បីរក្សាបាននូវសុខដុមនីយកម្មសាសនានៅកម្ពុជា, ការចូលរួមសហការលើកិច្ចការងារអភិវឌ្ឍសង្គម-សេដ្ឋកិច្ច និងការងារមនុស្សធម៌នោះ ក្រសួងធម្មការ និងសាសនាបានបង្កើតអភិក្រមស-៣ សម្រាប់វត្តអារាមក្នុងនោះមានដូចជា វត្តស្អាត វត្តស្វាង និងវត្តស្ងប់ ហើយបានផ្សព្វផ្សាយយ៉ាងទូលំទូលាយសម្រាប់អនុវត្តតាមវត្តអារាមនៅទូទាំងប្រទេស។ វត្តអារាមទាំងអស់ក៏ជាកន្លែងសម្រាប់អនុវត្តគោលនយោបាយគាំពារសង្គមរបស់រាជរដ្ឋាភិបាល និងចូលរួមផ្សព្វផ្សាយស្តីពីសុវត្ថិភាពកុមារ ការលុបបំបាត់អំពើហិង្សា ការទប់ស្កាត់ការជួញដូរ និងការប្រើប្រាស់គ្រឿងញៀនខុសច្បាប់ជាដើមផងដែរ៕

​ដោយ៖ គង់ ឌិន