អគ្គនាយកដ្ឋានដឹកជញ្ជូនផ្លូវអាកាស នៃរដ្ឋលេខាធិការដ្ឋានអាកាសចរណ៍ស៊ីវិល បានឱ្យដឹងថា កម្ពុជាកំពុងខិតខំបង្កើត និងត្រូវការសម្ព័ន្ធមិត្តច្រើន ដើម្បី​បើក​ចំហជើ​ងមេឃ​លើ​វិស័យ​អាកាស​ចរណ៍​ឱ្យកាន់តែទូលំទូលាយទៅ កាន់ពិភពលោក សំដៅទាក់ទាញ​ភ្ញៀវ​ទេសចរ​បរទេស​ឱ្យ​មក​ទស្សនា​កម្ពុជា​កាន់តែច្រើន។

ឯកឧត្តម វ៉ាន់ ចន្ទី អគ្គនាយក អគ្គនាយកដ្ឋានដឹកជញ្ជូនផ្លូវអាកាស នៃ​រដ្ឋលេខាធិការដ្ឋាន​អាកាស​ចរណ៍ស៊ីវិល ក្នុងបទសម្ភាសន៍ជាមួយBTV បានលើក​ឡើង​អំពី​វឌ្ឍនភាព​នៃ​វិស័យ​អាកាស​ចរណ៍ ថាក្រុមហ៊ុនអាកាសចរណ៍ជាតិ ត្រូវបានបង្កើតឡើងនៅឆ្នាំ២០០៩ ដែលមានឈ្មោះថា «អង្គរអ៊ែរ» ប៉ុន្តែចាប់ពី ដើមឆ្នាំ២០២៥ ត្រូវបានធ្វើការផ្លាស់ប្ដូរឈ្មោះពី "កម្ពុជាអង្គរអ៊ែរ" មក "air cambodia"។ ក្រុមហ៊ុន អាកាសចរណ៍ជាតិ មានកាតព្វកិច្ច ដើរ​តួនាទី​យ៉ាង​សំខាន់​នៅ​ក្នុង​ការ​សម្រប​សម្រួល និងជួយជំរុញដល់ គោលនយោបាយជាតិ។

ឯកឧត្តម បានបញ្ជាក់អំពីការបញ្ជាទិញយន្តហោះប៊ូអ៊ិញបន្ថែមទៀត ចំនួន១០គ្រឿងពីសហរដ្ឋ អាម៉េរិក និងមានលទ្ធភាពជ្រើសរើសបន្ថែមចំនួន១០គ្រឿងទៀត ដែលការ​បញ្ជាទិ​ញយ​ន្ត​ហោះ​ប៊ូ​អ៊ិញ​នេះ ​មិនមែនត្រឹមតែប្រើប្រាស់លើគោលដៅពាណិជ្ជកម្មសុទ្ធសាធទេ ប៉ុន្តែបាន​ជួយ​កម្ពុជា​ច្រើន​ណាស់​លើការ ចរចាពន្ធបដិការ រវាងកម្ពុជា និងសហរដ្ឋអាម៉េរិក។

ឯកឧត្តម វ៉ាន់ ចន្ទី បានបញ្ជាក់ថា ចំពោះយន្តហោះប៊ូអ៊ិញដែលបានបញ្ជាទិញ គឺត្រូវការរយៈពេល ៥ឆ្នាំ ទើបយើងអាចទទួលបានយន្តហោះយកមកប្រើដែលនៅក្នុងផែនការ គឺយើង​នឹង​ទទួល​បាន​មួយ​គ្រឿង ឬពីរគ្រឿង ដើម្បីយកមកប្រើប្រាស់មុន ដែលភាពយឺតនេះ មិនមែន​មក​ពី​យើង​អត់​សមត្ថ​ភាពទទួលទេ ប៉ុន្តែគឺដោយសារខ្សែច្រវាក់ផលិតកម្មរបស់ក្រុមហ៊ុនប៊ូអ៊ិញ ព្រោះក្រុមហ៊ុន​មួយ​នេះ មានអ្នកបញ្ជាទិញច្រើននៅលើពិភពលោក៕ អត្ថបទ៖ មុត សុទ្ធ