លោកស្រី von der Leyen ប្រធានគណៈកម្មការអឺរ៉ុប បាននិយាយកាលពីថ្ងៃអង្គារ ទី២៤ ខែកុម្ភៈ ថា សហភាពអឺរ៉ុប នឹងផ្តល់ប្រាក់កម្ចី៩០ពាន់លានអឺរ៉ូដល់អ៊ុយក្រែនតាមមធ្យោបាយមួយ ឬមធ្យោបាយផ្សេងទៀត។ 

ថ្លែងនៅសន្និសីទសារព័ត៌មានក្នុងទីក្រុងគីវក្នុងថ្ងៃខួបបួនឆ្នាំនៃការឈ្លានពានរបស់រុស្ស៊ី លោកស្រី បាននិយាយថា ប្លុកដែលមានសមាជិកចំនួន២៧ប្រទេសមួយនេះ នឹងធ្វើការលើកញ្ចប់ថាមពលក្នុងរដូវរងាថ្មីចំនួន៩២០លានអឺរ៉ូសម្រាប់អ៊ុយក្រែនឆ្នាំ ២០២៦-២០២៧។

លោកស្រី Von der Leyen បញ្ជាក់ថា អ៊ុយក្រែនមានមធ្យោបាយច្បាស់លាស់ឈានទៅរកសមាជិកភាពសហភាពអឺរ៉ុប ហើយចម្លើយចំពោះថាតើប្រទេសអាចចូលរួមបានឬអត់ គឺ «ពិតជាបាន» ខណៈទីក្រុងគីវ «កំពុងស្ថិតនៅលើផ្លូវដ៏ល្អប្រសើរ»។ លោកស្រីនិយាយថា សហភាពអឺរ៉ុបខិតកាន់តែជិតទៅរកការអនុម័តកញ្ចប់ទណ្ឌកម្មទី២០របស់ខ្លួន ដោយសន្យាថា វិធានការនានានឹងទប់លំហូរប្រាក់ចំណូលរបស់រុស្ស៊ី និងធ្វើឱ្យ «ក្បាលម៉ាស៊ីនសង្គ្រាម» របស់ប្រទេសនេះចុះខ្សោយ ដែលត្រូវបានសម្របសម្រួលជាមួយដៃគូប្រទេស G7 ដើម្បីធ្វើឲ្យមានផលប៉ះពាល់ខ្លាំង។

លោក Antonio Costa ប្រធានក្រុមប្រឹក្សាសហភាពអឺរ៉ុប ក្នុងអំឡុងសន្និសីទសារព័ត៌មាន បានជំរុញឱ្យរុស្ស៊ីចូលមករកតុចរចា «តាមរបៀបដ៏ម៉ឺងម៉ាត់» ដោយទទួលយកថាខ្លួននឹងមិនឈ្នះសង្គ្រាមទេ និងបាននិយាយថា អ៊ុយក្រែនបានរក្សាជំហររឹងមាំរយៈពេលជាងបួនឆ្នាំមកហើយ ទោះបីជាទីក្រុងមូស្គូ បង្កើនការវាយប្រហារក៏ដោយ។