ការស្ទង់មតិម្ដងហើយម្ដងទៀត បង្ហាញថា ជនជាតិអាមេរិកកាន់តែច្រើនឡើងៗ មានក្ដីបារម្ភថា ប្រធានាធិបតីអាមេរិក លោក Donald Trump មិនបានយកចិត្តទុកដាក់គ្រប់គ្រាន់ ចំពោះបញ្ហាសំខាន់បំផុតរបស់ប្រទេសឡើយ ដោយនេះជាកង្វល់ដ៏ស្ងាត់ស្ងៀមដែលគ្របដណ្ដប់លើសុន្ទរកថាប្រចាំឆ្នាំរបស់លោក កាលយប់ថ្ងៃអង្គារ (ទី២៤ ខែកុម្ភៈ ឆ្នាំ២០២៦)។

ការស្ទង់មតិរបស់ប្រព័ន្ធផ្សព្វផ្សាយ CNN ដែលចេញផ្សាយកាលពីថ្ងៃទី២៣ ខែកុម្ភៈ បានរកឃើញថា ភាគរយនៃជនជាតិអាមេរិក ដែលនិយាយថា ប្រធានាធិបតីផ្តោតលើរឿងខុស បានកើនឡើងដល់ជិត ៧០ភាគរយ ពោលគឺឡើងពីកម្រិត ៥៥ភាគរយ នៅក្នុងខែកុម្ភៈ ឆ្នាំ២០២៥។

ភាគច្រើននៃអ្នកបោះឆ្នោតវ័យក្មេង អ្នកឯករាជ្យ និងអ្នកបោះឆ្នោតមិនមែនជនជាតិស្បែកស ជាក្រុមអ្នកបោះឆ្នោតសំខាន់ៗដែលបានជួយឲ្យលោក Trump ជាប់ឆ្នោតឡើងវិញ និយាយថា ប្រធានាធិបតីមិនផ្តោតលើបញ្ហាសំខាន់បំផុតរបស់ប្រទេសនោះឡើយ។

បើយោងតាមការស្ទង់មតិមួយដែលធ្វើឡើងកាលពីសប្តាហ៍មុនដោយស្ថាប័ន ABC News/Washington Post/Ipsos បានឲ្យដឹងថា បើទោះជាជនជាតិអាមេរិក ៤៧ភាគរយ យល់ស្របលើការដោះស្រាយរបស់លោក Trump ជុំវិញបញ្ហាព្រំដែនសហរដ្ឋអាមេរិក-ម៉ិកស៊ិកក៏ដោយ ក៏មានតែ ៤០ភាគរយប៉ុណ្ណោះ ដែលយល់ស្របលើគោលនយោបាយអន្តោប្រវេសន៍ផ្សេងទៀតរបស់លោក។ ចំនួននោះ គឺជាការធ្លាក់ចុះ ១០ភាគរយ គិតចាប់តាំងពីលោកឡើងកាន់តំណែង។

ហើយជាមួយគ្នានេះ មានតែ ៣៤ភាគរយនៃជនជាតិអាមេរិកប៉ុណ្ណោះ ដែលយល់ស្របលើការដោះស្រាយបញ្ហាពន្ធរបស់លោក Trump ទោះបីជាលោកកំពុងមានចំណាត់ការស្វែងរកមធ្យោបាយនានា ពាក់ព័ន្ធនឹងសេចក្តីសម្រេចរបស់តុលាការកំពូលកាលពីថ្ងៃទី២០ ខែកុម្ភៈ ដែលបានបដិសេធសេចក្តីសម្រេចជាច្រើនក៏ដោយ៕