យោងតាមការអះអាងរបស់ក្រុមអាជ្ញាធរក្នុងស្រុក បានឲ្យដឹងថា មនុស្សយ៉ាងហោច ១៦នាក់ រួមទាំងស្រ្តី និងកុមារ ៨នាក់ ត្រូវបានសម្លាប់ នៅក្នុងការប៉ះទង្គិចគ្នារវាងរថយន្តក្រុង និងរថយន្តធំ នៅភាគខាងត្បូងប្រទេសយេម៉ែន ។

ក្រុមអាជ្ញាធរ និយាយកាលពីថ្ងៃអង្គារថា ឧបទ្ទេវហេតុគ្រោះថ្នាក់នេះ បានកើតឡើងនៅតំបន់ Lahmar ស្ថិតក្នុងស្រុក Al-Mahfad នៅលើផ្លូវឆ្លងកាត់ដ៏សំខាន់តភ្ជាប់ខេត្ត Abyan និងខេត្ត Shabwa ។

ទីភ្នាក់ងារព័ត៌មាន Anadolu របស់ទួរគី រាយការណ៍ថា កម្លាំងនៃការបុកបណ្តាលឲ្យកើតមានអគ្គិភ័យឆាបឆេះរថយន្តក្រុង ធ្វើឲ្យគ្មានអ្នករស់រាននោះទេនៅក្នុងចំណោមអ្នកដំណើរ ។

ទីភ្នាក់ងារព័ត៌មានរ៉យទ័យរាយការណ៍ដោយស្រង់សេចក្តីថ្លែងការណ៍ចេញដោយក្រុមន្រ្តីសន្តិសុខថា ឧបទ្ទេវហេតុនេះ បានកើតឡើងដោយសារការជែងគ្នាពុំត្រឹមត្រូវ នៅលើកំណាត់ផ្លូវកោងដ៏គ្រោះថ្នាក់ ខណៈរថយន្តក្រុងប្រើហ្គាស បណ្តាលកើតមានអគ្គិភ័យភ្លាមៗ ធ្វើឲ្យអ្នករាល់គ្នានៅក្នុងរថយន្តរងការឆាបឆេះរហូតដល់ស្លាប់គ្មានសល់នរណាម្នាក់ ។

គ្រោះថ្នាក់ចរាចរណ៍នៅថ្ងៃអង្គារនោះដែរ គឺជាឧបទ្ទេវហេតុគ្រោះថ្នាក់ចរាចរណ៍ស្លាប់មនុស្សច្រើនបំផុតទី ២ នៅយេម៉ែន ក្នុងរយៈពេលប៉ុន្មានឆ្នាំកន្លងមកនេះ ហើយនិងជាគ្រោះថ្នាក់ដ៏អាក្រក់បំផុត មកទល់នឹងពេលនេះ ក្នុងឆ្នាំ ២០២៦នេះ ។

កាលពីឆ្នាំមុន មនុស្ស ១៧នាក់ បានស្លាប់នៅក្នុងគ្រោះថ្នាក់ចរាចរណ៍ដ៏រន្ធត់នៅលើផ្លូវភ្នំដ៏គ្រោះថ្នាក់ ស្ថិតក្នុងខេត្ត Abyan ៕