នៅថ្ងៃពុធ (ទី២៥ ខែកុម្ភៈ ឆ្នាំ២០២៦) នេះ ប្រទេសអ៊ីរ៉ង់បានច្រានចោលការអះអាងរបស់សហរដ្ឋអាមេរិក អំពីកម្មវិធីមីស៊ីលរបស់ខ្លួន ដោយចាត់ទុកថា ជា «និយាយការកុហកទាំងស្រុង» បន្ទាប់ពីប្រធានាធិបតី Donald Trump បានលើកឡើងថា ទីក្រុងតេអេរ៉ង់កំពុងអភិវឌ្ឍមីស៊ីលដែលអាចវាយប្រហារដល់សហរដ្ឋអាមេរិក។

នៅក្នុងសុន្ទរកថាប្រចាំឆ្នាំរបស់លោក កាលពីថ្ងៃអង្គារ លោក Trump បានចោទប្រកាន់ទីក្រុងតេអេរ៉ង់ថាមាន «មហិច្ឆតានុយក្លេអ៊ែរដ៏អាក្រក់» ខណៈដែលទីក្រុងវ៉ាស៊ីនតោនបង្កើនសម្ពាធ ដោយការដាក់ពង្រាយកម្លាំងយោធាយ៉ាងច្រើន នៅជុំវិញឈូងសមុទ្រពែរ្ស។

គូសត្រូវទាំង២ គ្រោងនឹងជួបគ្នា សម្រាប់កិច្ចចរចាជុំទី៣ នាថ្ងៃព្រហស្បតិ៍ នៅទីក្រុងហ្សឺណែវ ប្រទេសស្វីស ជាកិច្ចប្រឹងប្រែង ដើម្បីធ្វើយ៉ាងណាឈានដល់ដំណោះស្រាយការទូត។

នៅមុនកិច្ចចចារនេះកើតឡើង លោក Trump បានអះអាងថា ទីក្រុងតេអេរ៉ង់ «បានអភិវឌ្ឍរួចហើយនូវមីស៊ីលដែលអាចគំរាមកំហែងដល់អឺរ៉ុប និងមូលដ្ឋានរបស់យើងនៅក្រៅប្រទេស ហើយពួកគេកំពុងធ្វើការ ដើម្បីផលិតមីស៊ីលដែលនឹងអាចទៅដល់សហរដ្ឋអាមេរិកក្នុងពេលឆាប់ៗនេះ»។

លោកបាននិយាយថា អ៊ីរ៉ង់ចង់ «ចាប់ផ្តើមគ្រប់យ៉ាងជាថ្មី» ជាមួយនឹងកម្មវិធីនុយក្លេអ៊ែររបស់ខ្លួន ហើយកំពុងក្នុងដំណាក់កាល «ដែលបន្តមហិច្ឆតានុយក្លេអ៊ែរដ៏អាក្រក់របស់ពួកគេម្តងទៀត»។

ប៉ុន្តែអ្នកនាំពាក្យក្រសួងការបរទេសអ៊ីរ៉ង់ លោក Esmaeil Baqaei នៅថ្ងៃពុធនេះ បានបដិសេធការអះអាងទាំងនោះ ដោយមិនបានលើកឡើងអំពីលោក Trump ដោយផ្ទាល់នោះទេ។ លោកបានឲ្យដឹងនៅលើបណ្ដាញសង្គម X ថា៖ «អ្វីក៏ដោយដែលពួកគេកំពុងចោទប្រកាន់ទាក់ទងនឹងកម្មវិធីនុយក្លេអ៊ែររបស់អ៊ីរ៉ង់ មីស៊ីលបាលីស្ទិករបស់អ៊ីរ៉ង់ ហើយនិងចំនួនអ្នកស្លាប់ និងរបួស ក្នុងអំឡុងពេលមានភាពចលាចលកាលខែមករា គឺគ្រាន់តែជាការនិយាយឡើងវិញនូវពាក្យសម្ដីកុហកទាំងស្រុងប៉ុណ្ណោះ»៕