ស្ថិតនៅតំបន់ជាយក្រុងនៃរដ្ឋធានីអាដែន ប្រទេសយេម៉ែន ស្រុក al-Basateen បង្ហាញពីរឿងរ៉ាវអាយុកាលច្រើនទសវត្សរ៍របស់ជនភៀសខ្លួនសូម៉ាលី ។ 

អ្នកស្រុកស្គាល់ឈ្មោះស្រុកមួយនេះថាមានឈ្មោះច្រើន រួមទាំងឈ្មោះ “យេម៉ែន ម៉ូហ្គាឌីស៊ូ” និងឈ្មោះ “ស្រុកសូម៉ាលី” ដោយសំដៅលើការផ្លាស់ប្តូរប្រជាសាស្រ្ត ចាប់តាំងពីទសវត្សរ៍ឆ្នាំ ១៩៩០រហូតមក ពេលដែលសង្រ្គាមស៊ីវិលនៅសូម៉ាលី បានជំរុញឲ្យមនុស្សរាប់ពាន់នាក់នៅទូទាំងតំបន់ឈូងសមុទ្រអាដែន ស្វែងរកទីសុវត្ថិភាព ។

សព្វថ្ងៃ ស្រុកមួយនេះមានពលពលរដ្ឋរស់នៅជាង ៤ម៉ឺននាក់ ក្នុងនោះពលរដ្ឋមានដើមកំណើតសូម៉ាលី មានចំនួនភាគច្រើន ។ ពួកគេរស់នៅក្នុងស្ថានភាពក្រលំបាក ជាទីដែលភាពងាយរងគ្រោះសេដ្ឋកិច្ចត្រួតស៊ីគ្នាជាមួយស្ថានការស្របច្បាប់ពុំទាន់បានដោះស្រាយ ។

ពលរដ្ឋមួយចំនួនបានមកដល់តាំងពីពួកគេនៅក្មេងកាន់ដៃសាច់ញាតិ ខណៈពលរដ្ឋខ្លះទៀត កើតនៅក្នុងទីក្រុងអាដែន ហើយមិនស្គាល់ស្រុកកំណើតរបស់ខ្លួនឡើយ ប៉ុន្តែពួកគេចែករំលែងរឿងតែមួយ គឺស្លាកជនភៀសខ្លួនបោះត្រាលើឯកសារផ្លូវការរបស់ពួកគេ ។

នៅពេលព្រឹក មនុស្សប្រុសរាប់សិបនាក់ឈរចាំតាមផ្លូវ ដើម្បីឡើងជិះរថយន្តទៅធ្វើការសំណង់ ឬការងារដោយដៃផ្សេងទៀត ។ ពួកគេភាគច្រើនពឹងផ្អែកលើការជួលកម្លាំងពលកម្ម ដើម្បីអាចរកអាហារទទួលទានបាន ។

អ្នកស្រុកនិយាយថា ពួកគេពុំមានការងារជាប់លាប់នោះទេនៅក្នុងស្រុក al-Basateen ស្របពេលដែលភាពក្រីក្ររីករាលដាលកាន់តែខ្លាំង ហើយជំនួយមនុស្សធម៌ ធ្លាក់ចុះ ៕