លោកប្រធានាធិបតី Volodymyr Zelenskiy បាននិយាយនៅថ្ងៃពុធ (ទី២៥ ខែកុម្ភៈ ឆ្នាំ២០២៦) នេះថា អ្នកចរចាអ៊ុយក្រែន នឹងជួបជាមួយមន្ត្រីអាមេរិក នៅថ្ងៃព្រហស្បតិ៍ ដើម្បីពិភាក្សាអំពីការកសាងប្រទេសឡើងវិញក្រោយសង្គ្រាម ក្នុងនោះមានរួមទាំង «កញ្ចប់វិបុលភាព» ផងដែរ។

អំឡុងការជជែកជាមួយប្រព័ន្ធផ្សព្វផ្សាយ តាមរយៈកម្មវិធី WhatsApp លោក Zelenskiy បានប្រាប់អ្នកសារព័ត៌មានថា ក្រុមទាំងនោះក៏នឹងពិភាក្សាអំពីការរៀបចំ សម្រាប់កិច្ចប្រជុំត្រីភាគី ដែលនឹងរួមបញ្ចូលរុស្ស៊ីផងដែរ ដោយបន្ថែមថា ទីក្រុងគីវសង្ឃឹមថា ព្រឹត្តិការណ៍នេះនឹងកើតឡើងនៅដើមខែមីនា។

លោក Zelenskiy បាននិយាយថា លោក Rustem Umerov ដែលជាលេខាធិការក្រុមប្រឹក្សាសន្តិសុខ និងការពារជាតិ និងជាប្រមុខក្រុមចរចាអ៊ុយក្រែន នឹងជួបគ្នានៅទីក្រុងហ្សឺណែវ ប្រទេសស្វីស ជាមួយបេសកជនពិសេសអាមេរិក លោក Steve Witkoff និងលោក Jared Kushner ដែលជាកូនប្រសាររបស់ប្រធានាធិបតីអាមេរិក។

លោក Zelenskiy បានបន្ថែមថា៖ «ជាដំបូង នឹងមានកិច្ចប្រជុំទ្វេភាគីជាមួយភាគីអាមេរិក។ បញ្ហាដំបូង គឺកញ្ចប់វិបុលភាព ដែលជាកញ្ចប់សម្រាប់ការស្តារឡើងវិញរបស់អ៊ុយក្រែន ហើយមន្ត្រីនៃភាគីទាំង២ នឹងពិភាក្សាអំពីសេចក្ដីលម្អិតនានា»។

ដំណើរការកសាងឡើងវិញ សម្រាប់ប្រទេសអ៊ុយក្រែន បន្ទាប់ពីមានការបំផ្លិចបំផ្លាញដែលបង្កឡើងដោយការវាយប្រហារតាមអាកាសរបស់រុស្ស៊ី និងការប្រយុទ្ធនៅជួរមុខ បានក្លាយជាប្រធានបទសំខាន់មួយ នៅក្នុងការពិភាក្សាយ់ាងទូលំទូលាយ អំពីរបៀបបញ្ចប់សង្គ្រាមដែលបានឈានចូលដល់ឆ្នាំទី៥ ហើយ នៅសប្តាហ៍នេះ៕