លោក Christophe Leribault ត្រូវបានតែងតាំងជានាយកថ្មីរបស់សារមន្ទីរ Louvre នៅទីក្រុងប៉ារីស បន្ទាប់ពីមានការលាលែងពីតំណែងរបស់លោកស្រី Laurence des Cars កាលពីថ្ងៃអង្គារ (ទី២៤ ខែកុម្ភៈ ឆ្នាំ២០២៦)។

វិមាន Élysee ឲ្យដឹងថា ភារកិច្ចចម្បងរបស់អ្នកប្រវត្តិវិទូសិល្បៈវ័យ ៦២ឆ្នាំរូបនេះ នឹងធានាសុវត្ថិភាព និងទំនើបកម្មនៃសារមន្ទីរ Louvre នេះ និងអនុវត្តគម្រោង «New Renaissance» (ការចាប់ផ្ដើមធ្វើឲ្យប្រសើរឡើងវិញថ្មី) របស់ប្រធានាធិបតីបារាំង។

កាលពីឆ្នាំមុន បន្ទាប់ពីមានរបាយការណ៍លេចធ្លាយ អំពីហេដ្ឋារចនាសម្ព័ន្ធដែលទ្រុឌទ្រោមរបស់សារមន្ទីរនេះ លោក Emmanuel Macron បានប្រកាសពីផែនការជួសជុលឡើងវិញចំនួន ៨០០លានអឺរ៉ូ ដែលទទួលបានមូលនិធិមួយផ្នែកពីការដំឡើងតម្លៃសំបុត្រ សម្រាប់ពលរដ្ឋមិនមែនសហភាពអឺរ៉ុប (EU)។

បញ្ហាដំបូងរបស់លោក Leribault គឺត្រូវដោះស្រាយវិបត្តិដែលបានផ្ទុះឡើងនៅសារមន្ទីរដែលមានអ្នកទស្សនាច្រើនបំផុតរបស់ពិភពលោក បន្ទាប់ពីមានការលួចដ៏គួរឲ្យភ្ញាក់ផ្អើលយកគ្រឿងអលង្ការមកុដដ៏អស្ចារ្យរបស់ប្រទេសបារាំង ដែលជាចោរកម្មកណ្ដាលថ្ងៃចែស កាលពីខែតុលាឆ្នាំមុន។

របស់របរដែលត្រូវបានលួចនោះ មិនទាន់ត្រូវបានរកឃើញនៅឡើយទេ ប៉ុន្តែសារមន្ទីរ Louvre ថ្មីៗនេះបានប្រកាសថា ការជួសជុលនឹងត្រូវបានធ្វើឡើង សម្រាប់មកុដរបស់ម្ចាស់ក្សត្រី Eugénie ដែលបានធ្លាក់ ហើយខូចខាត ក្នុងអំឡុងពេលមានចោរកម្មនោះ៕