យោធាអាមេរិក និងកូរ៉េខាងត្បូង នៅថ្ងៃពុធ (ទី២៥ ខែកុម្ភៈ ឆ្នាំ២០២៦) នេះ បានប្រាប់ឲ្យដឹងថា ភាគីទាំង២ នឹងធ្វើសមយុទ្ធនិទាឃរដូវប្រចាំឆ្នាំនៅខែក្រោយ ដើម្បីលើកកម្ពស់សមត្ថភាពការពារជាតិរួមគ្នារបស់ប្រទេសពួកគេ ដោយការហ្វឹកហាត់នេះកើតមានឡើងស្របនឹងភាពជាប់គាំងការទូតកាន់តែខ្លាំង ជាមួយកូរ៉េខាងជើងដែលប្រដាប់ដោយអាវុធនុយក្លេអ៊ែរ។

បើយោងតាមសេចក្ដីប្រកាស បានឲ្យដឹងថា សមយុទ្ធខែលសេរីភាព (Freedom Shield) ត្រូវបានកំណត់កើតឡើងនៅថ្ងៃទី ៩-១៩ ខែមីនា។ កូរ៉េខាងជើងបានពណ៌នាជាយូរមកហើយអំពីសមយុទ្ធរួមគ្នារបស់សម្ព័ន្ធមិត្តនេះថា ជាការហាត់សមឈ្លានពាន ហើយបានប្រើប្រាស់វាជាលេស ដើម្បីបង្កើនការបង្ហាញសកម្មភាពយោធា និងសាកល្បងអាវុធរបស់ខ្លួន។ តែសម្ព័ន្ធមិត្តទាំង២ បញ្ជាក់ថា សមយុទ្ធនេះមានលក្ខណៈការពារ។

ការប្រកាសនេះបានកើតឡើងនៅពេលដែលកូរ៉េខាងជើងកំពុងធ្វើសន្និសីទនយោបាយដ៏សំខាន់ ដែលមេដឹកនាំលោក គីម ជុងអ៊ុន (Kim Jong Un) ត្រូវបានគេរំពឹងថា នឹងគូសបញ្ជាក់ពីគោលនយោបាយក្នុងស្រុក ការបរទេស និងគោលដៅយោធាសំខាន់ៗរបស់លោក សម្រាប់រយៈពេល ៥ឆ្នាំខាងមុខ។ 

មកទល់ពេលនេះ ប្រព័ន្ធផ្សព្វផ្សាយរដ្ឋកូរ៉េខាងជើងមិនទាន់បានរាយការណ៍ពីការអត្ថាធិប្បាយដោយផ្ទាល់ណាមួយ ពីសំណាក់លោក គីម ជុំវិញទំនាក់ទំនងជាមួយទីក្រុងវ៉ាស៊ីនតោន និងសេអ៊ូល នៅឯសមាជគណបក្សពលករដែលកំពុងកាន់អំណាច ដែលបានចាប់ផ្តើមកាលពីសប្តាហ៍មុន៕

សមយុទ្ធ Freedom Shield គឺជាសមយុទ្ធមួយ ក្នុងចំណោម ២ ដែលសម្ព័ន្ធមិត្តទាំង២ តែងតែធ្វើជារៀងរាល់ឆ្នាំ។ ការហាត់សមរួមគ្នាមួយទៀត គឺឈ្មោះ Ulchi Freedom Shield ដែលធ្វើឡើងក្នុងខែសីហា ៕