ក្រុមជំនួយអន្តរជាតិចំនួន ១៧អង្គការ បាននិយាយថា ពួកគេបានប្តឹងតុលាការកំពូលអ៊ីស្រាអែល ដើម្បីអនុញ្ញាតឲ្យពួកគេបន្តការងារនៅតំបន់ហ្កាហ្សាស្រ្ទីប និងកន្លែងផ្សេងទៀតនៅតំបន់កាន់កាប់ប៉ាឡេស្ទីន ជាទីដែលរដ្ឋាភិបាលអ៊ីស្រាអែល គ្រោងនឹងបញ្ឈប់ការងារសង្រ្គោះជីវិតរបស់ពួកគេនៅខែក្រោយ ។

រដ្ឋាភិបាលអ៊ីស្រាអែលនិយាយថា ពួកគេនឹងហាមឃាត់ក្រុមជំនួយចំនួន ៣៧អង្គការ មិនឲ្យធ្វើការនៅតំបន់ហ្កាហ្សាដែលហែកហួរដោយភ្លើងសង្រ្គាម តំបន់កាន់កាប់វ៉េសប៊ែង និងតំបន់កាន់កាប់ហ្សេរុយសាឡឹមខាងកើត ចាប់ពីថ្ងៃទី ១ ខែមីនា ឆ្នាំ ២០២៦តទៅ គឺជាចំណាត់ការមួយ ត្រូវបានចាត់ទុកថាជាផលវិបាកយ៉ាងធ្ងន់ធ្ងរសម្រាប់ជនប៉ាឡេស្ទីន ។

នៅក្នុងសេចក្តីថ្លែងការណ៍រួមកាលពីថ្ងៃអង្គារ ក្រុមជំនួយនិយាយថា ពួកគេបានប្តឹងឧទ្ធរណ៍ទៅតុលាការកំពូលអ៊ីស្រាអែល ដើម្បីស្វែងរកការផ្អាក់បន្ទាន់ផែនការហាមឃាត់ពួកគេមិនឲ្យធ្វើការ ហើយពួកគេកំពុងស្វែងរកដីកាបង្គាប់បណ្តោះអាសន្នដ៏បន្ទាន់ពីតុលាការ ដើម្បីពិនិត្យមើលបទបញ្ជារបស់អ៊ីស្រាអែល ។

អង្គការក្រៅរដ្ឋាភិបាល Oxfam និយាយកាលពីថ្ងៃអង្គារថា ការបិទប្រតិបត្តិការជំនួយដោយបង្ខំនៅតំបន់ហ្កាហ្សា និងតំបន់ផ្សេងទៀតនៃដែនដីកាន់កាប់ប៉ាឡេស្ទីន អាចនឹងចាប់ផ្តើមនៅថ្ងៃសៅរ៍ខាងមុខនេះ ។

អង្គការ Oxfam និយាយថា ផលប៉ះពាល់នឹងមានភ្លាមចំពោះអង្គការជំនួយ រហូតដល់ប្រព័ន្ធមនុស្សធម៌ធំទូលាយ ។ 

ពួកគេនិយាយនៅក្នុងសេចក្តីថ្លែងការណ៍ថា នៅតំបន់ហ្កាហ្សា គ្រួសារនៅពឹងផ្អែកជំនួយពីខាងក្រៅ ស្របពេលការរឹតត្បិតនៅតែបន្តលើការចូលជំនួយ ហើយនិងការវាយប្រហារថ្មីលើតំបន់ដែលមានមនុស្សរស់នៅច្រើនកុះករ ។

ពួកគេថា នៅតំបន់វ៉េសប៊ែង រួមទាំងតំបន់ហ្សេរុយសាឡឹមខាងកើត ការឈ្លានពានរបស់យោធា ការបំផ្លិចបំផ្លាញ ការផ្លាស់ទីលំនៅ ការពង្រីកការតាំងទីលំនៅនិគមន៍ និងអំពើហិង្សារបស់អ្នកតាំងលំនៅនិគមន៍ បង្កឲ្យមានតម្រូវការមនុស្សធម៌កើនឡើង ៕