អ៊ីរ៉ង់បានរិះគន់កាលពីថ្ងៃពុធ២៥កុម្ភៈសប្ដាហ៍នេះ ចំពោះយុទ្ធសាស្ត្រដាក់សម្ពាធរបស់លោកDonald Trump មុនកិច្ចពិភាក្សាដ៏សំខាន់នៅទីក្រុងហ្សឺណែវស្តីពីកម្មវិធីនុយក្លេអ៊ែរទីក្រុងតេអេរ៉ង់ ដោយហៅសុន្ទរកថារបស់លោកថាជាការកុហកហួសហេតុ។

លោកTrumpបានបង្ហើបយ៉ាងខ្លីអំពីលទ្ធភាពវាយប្រហារអ៊ីរ៉ង់ក្នុងសុន្ទរកថាប្រចាំឆ្នាំរបស់លោកទៅកាន់សភាកាលពីថ្ងៃអង្គារ២៤កុម្ភៈសប្ដាហ៍នេះ ដោយនិយាយថាលោកនឹងមិនអនុញ្ញាតឱ្យប្រទេសគាំទ្រភេរវកម្មធំជាងគេបំផុតរបស់ពិភពលោកមួយនេះមានអាវុធនុយក្លេអ៊ែរនោះទេ។

នៅក្នុងសុន្ទរកថារបស់លោក លោក Trump បានចង្អុលបង្ហាញពីការគាំទ្ររបស់ទីក្រុងតេអេរ៉ង់ចំពោះក្រុមសកម្មប្រយុទ្ធ ការសម្លាប់ក្រុមបាតុករ និងកម្មវិធីមីស៊ីល និងនុយក្លេអ៊ែររបស់ប្រទេសនេះ ជាការគំរាមកំហែងដល់តំបន់ និងសហរដ្ឋអាមេរិក។

លោកនិយាយថា អ៊ីរ៉ង់ចង់ចាប់ផ្តើមគ្រប់យ៉ាងជាថ្មី ជាមួយនឹងកម្មវិធីនុយក្លេអ៊ែររបស់ខ្លួន ហើយកំពុងស្ថិតក្នុងដំណាក់កាលដែលបន្តមហិច្ឆតានុយក្លេអ៊ែរដ៏អាក្រក់របស់ពួកគេម្តងទៀត។លោកTrumpលើកឡើងថា ទីក្រុងតេអេរ៉ង់កំពុងអភិវឌ្ឍមីស៊ីលដែលអាចវាយប្រហារដល់សហរដ្ឋអាមេរិក។ប៉ុន្តែអ្នកនាំពាក្យក្រសួងការបរទេសអ៊ីរ៉ង់ លោក Esmaeil Baqaei បានបដិសេធការអះអាងទាំងនោះដោយចាត់ទុកថាជាការកុហកទាំងស្រុង។

ការអត្ថាធិប្បាយរបស់មន្ត្រីអ៊ីរ៉ង់មុនកិច្ចពិភាក្សានៅថ្ងៃព្រហស្បតិ៍នេះ កើតឡើងខណៈអាមេរិកបានដាក់ពង្រាយយន្តហោះ និងនាវាចម្បាំងដ៏ធំបំផុតរបស់ខ្លួនទៅកាន់មជ្ឈិមបូព៌ាក្នុងរយៈពេលជាច្រើនទសវត្សរ៍ ជាផ្នែកមួយនៃកិច្ចខិតខំប្រឹងប្រែងរបស់លោក Trump ដើម្បីទទួលបានកិច្ចព្រមព្រៀងមួយក្នុងការឹតត្បិតកម្មវិធីនុយក្លេអ៊ែររបស់អ៊ីរ៉ង់ ខណៈប្រទេសនេះកំពុងព្យាយមទប់ទល់បញ្ហាក្នុងស្រុកក្រោយការតវ៉ាទូទាំងប្រទេសកាលពីខែមុន។ ក្នុងករណីការចរចាបរាជ័យ លោក Trump បានគំរាមវាយប្រហារអ៊ីរ៉ង់ម្តងហើយម្តងទៀត ជាអ្វីដែលបណ្ដាប្រទេសនៅមជ្ឈិមបូព៌ាខ្លាចថាអាចនឹងក្លាយជាសង្គ្រាមក្នុងតំបន់ថ្មីមួយ ខណៈភ្លើងសង្គ្រាមអ៊ីស្រាអែល-ហាម៉ាសដែលអូសបន្លាយជាច្រើនឆ្នាំនៅតែឆេះ។ អ៊ីរ៉ង់និយាយរួចហើយថា មូលដ្ឋានយោធាអាមេរិកទាំងអស់នៅមជ្ឈិមបូព៌ានឹងត្រូវបានចាត់ទុកថាជាគោលដៅស្របច្បាប់ ដែលធ្វើឱ្យសមាជិកយោធាអាមេរិករាប់ម៉ឺននាក់នៅក្នុងតំបន់ប្រឈមនឹងហានិភ័យ៕