ប្រធានាធិបតីអ៊ុយក្រែន លោក Volodymyr Zelenskyy បាននិយាយថា រូបលោក និងសមភាគីអាមេរិករបស់លោក គឺ លោក Donald Trump បានជួបសន្ទនាតាមទូរស័ព្ទកាលពីថ្ងៃពុធ ២៥កុម្ភៈសប្ដាហ៍នេះដោយលោកទាំងពីរ បានពិភាក្សាអំពីបញ្ហាដែលត្រូវដោះស្រាយអំឡុងពេលកិច្ចចរចាទ្វេភាគី អ៊ុយក្រែន -អាមេរិកនៅថ្ងៃព្រហស្បតិ៍សប្ដាហ៍នេះ នៅប្រទេសស្វីស។ 

ក្នុងសេចក្តីថ្លែងការណ៍មួយនៅលើប្រព័ន្ធផ្សព្វផ្សាយសង្គមX បន្ទាប់ពីការសន្ទនាតាមទូរស័ព្ទ ដែលលោកបាននិយាយថា ក៏មានការចូលរួមពីបេសកជនពិសេសលោក Steve Witkoff និងកូនប្រសាររបស់លោក Trump គឺលោក Jared Kushner ផងដែរ លោក Zelenskyy បាននិយាយថា ពួកលោកក៏បានពិភាក្សាអំពីការរៀបចំសម្រាប់កិច្ចចរចាសន្តិភាពត្រីភាគីបន្ទាប់រវាងទីក្រុងមូស្គូ ទីក្រុងគីវ និងទីក្រុងវ៉ាស៊ីនតោន នៅដើមខែមីនា ផងដែរ។

លោក Zelenskyy បាននិយាយថា ពួកលោករំពឹងថាកិច្ចប្រជុំនេះនឹងបង្កើតឱកាសមួយដើម្បីជំរុញកិច្ចចរចាទៅកាន់កម្រិតមេដឹកនាំ។ ប្រធានាធិបតី Trump គាំទ្រលំដាប់នៃជំហានទាំងនេះ។ នេះជាមធ្យោបាយតែមួយគត់ដើម្បីដោះស្រាយបញ្ហាស្មុគស្មាញ និងរសើបទាំងអស់ និងបញ្ចប់សង្គ្រាមជាស្ថាពរ។

លោក Zelenskyy បាននិយាយថា ទាំងក្រុមមន្ត្រីអ៊ុយក្រែន ទាំងអាមេរិក បានធ្វើការយ៉ាងសកម្ម ហើយលោកបានអរគុណពួកគេចំពោះការងារទាំងអស់របស់ពួកគេ និងចំពោះការចូលរួមយ៉ាងសកម្មរបស់ពួកគេក្នុងការចរចា និងកិច្ចខិតខំប្រឹងប្រែងដើម្បីបញ្ចប់សង្គ្រាម។

លោកបានបន្ថែមថា ពួកលោកក៏ឲ្យតម្លៃយ៉ាងខ្លាំងចំពោះគំនិតផ្តួចផ្តើម បញ្ជីតម្រូវការអ៊ុយក្រែនអាទិភាព (PURL) ផងដែរ។ រដូវរងានេះគឺជារដូវរងាដ៏លំបាកបំផុតសម្រាប់អ៊ុយក្រែន ប៉ុន្តែមីស៊ីលសម្រាប់ប្រព័ន្ធការពារដែនអាកាសដែលពួកលោកទិញពីសហរដ្ឋអាមេរិកកំពុងជួយប្រទេសនេះឆ្លងកាត់បញ្ហាប្រឈមទាំងអស់នេះ និងការពារអាយុជីវិត៕