អ៊ីរ៉ង់ និងសហរដ្ឋអាមេរិក កំពុងរៀបចំបើកកិច្ចចរចាជុំចុងក្រោយបំផុតនៅទីក្រុងហ្សឺណែវ នាថ្ងៃព្រហស្បតិ៍ ទី២៦ ខែកុម្ភៈ នេះ ដែលមានបំណងដោះស្រាយជម្លោះនុយក្លេអ៊ែរយូរអង្វែងរបស់ភាគីទាំងពីរ និងទប់ស្កាត់ការវាយប្រហារថ្មីណាមួយរបស់អាមេរិកទៅលើអ៊ីរ៉ង់ ស្របពេលវត្តមានយោធាទ្រង់ទ្រាយធំរបស់ទីក្រុងវ៉ាស៊ីនតោន និងការគំរាមគ្នាទៅមករវាងភាគីទាងពីរ។

អាមេរិក-អ៊ីរ៉ង់ បានបន្តកិច្ចចរចាឡើងវិញនៅខែកុម្ភៈនេះ ដោយសង្ឃឹមថា នឹងអាចដោះស្រាយភាពជាប់គាំងអស់ជាច្រើនទសវត្សរ៍ លើកម្មវិធីនុយក្លេអ៊ែររបស់ទីក្រុងតេអេរ៉ង់ ដែលទីក្រុងវ៉ាស៊ីនតោន បណ្ដារដ្ឋលោកខាងលិចផ្សេងទៀត និងអ៊ីស្រាអែលជឿជាក់ថា មានគោលបំណងកសាងអាវុធនុយក្លេអ៊ែរ។ ទីក្រុងតេអេរ៉ង់ តែងបដិសេធរឿងនេះជាប់រហូត។

មន្ត្រីអាមេរិកបានប្រាប់សារព័ត៌មានរ៉យទ័រថា លោក Steve Witkoff ប្រេសិតពិសេសរបស់អាមេរិក និងលោក Jared Kushner កូនប្រសាររបស់លោកប្រធានាធិបតីអាមេរិក Donald Trump នឹងចូលរួមកិច្ចចរចាដោយប្រយោល ជាមួយរដ្ឋមន្ត្រីការបរទេសអ៊ីរ៉ង់ លោក Abbas Araqchi។ កិច្ចពិភាក្សានេះធ្វើឡើងបន្ទាប់ពីការចរចានៅទីក្រុងហ្សឺណែវ កាលពីសប្តាហ៍មុន ហើយនឹងត្រូវសម្របសម្រួលដោយរដ្ឋមន្ត្រីការបរទេសអូម៉ង់ លោក Badr Albusaidi។

ប្រធានាធិបតីអាមេរិក លោក Donald Trump បានលើកឡើងដោយសង្ខេបអំពីហេតុផលរបស់លោកសម្រាប់លទ្ធភាពនៃការវាយប្រហារលើអ៊ីរ៉ង់ ក្នុងសុន្ទរកថាប្រចាំឆ្នាំទៅកាន់សភាកាលពីថ្ងៃអង្គារ ដោយនិយាយថា លោកចង់ដោះស្រាយបញ្ហាតាមរយៈការទូត ប៉ុន្តែលោកនឹងមិនអនុញ្ញាតឱ្យទីក្រុងតេអេរ៉ង់មានអាវុធនុយក្លេអ៊ែរជាដាច់ខាត។ នៅថ្ងៃពុធ អនុប្រធានាធិបតីអាមេរិក លោក JD Vance បានគូសបញ្ជាក់ពីការប្ដេជ្ញាចិត្តនេះ ដោយនិយាយថា «អ៊ីរ៉ង់មិនអាចមានអាវុធនុយក្លេអ៊ែរបានឡើយ»៕